.jpg)
"Gənclərin sahibkarlığa marağı müasir iqtisadi inkişafın ən vacib mövzularından biridir. Bu marağın arxasında duran motivasiyanı araşdırarkən iki əsas amil ön plana çıxır: ehtiyac və ideya. Lakin bu iki faktor bir-birini tamamlayır və gənclərin sahibkarlığa yanaşmasını müəyyənləşdirir". Bu sözləri SİA-ya açıqlamasında iqtisadçı ekspert Asif İbrahimov deyib.
Onun sözlərinə görə, ehtiyac, əsaslı sahibkarlıq daha çox sosial-iqtisadi problemlərin mövcud olduğu mühitdə formalaşır. İşsizlik səviyyəsinin yüksək olduğu, sabit və yaxşı ödənişli iş imkanlarının məhdud qaldığı şəraitdə gənclər üçün sahibkarlıq alternativ gəlir mənbəyi kimi çıxış edir: "Bu halda biznes qurmaq ideyadan çox, məcburiyyətdən qaynaqlanır və məqsəd əsasən maliyyə sabitliyi təmin etmək olur. Xüsusilə regionlarda və kənd yerlərində bu tendensiya daha çox müşahidə edilir. Digər tərəfdən, ideya əsaslı sahibkarlıq isə innovasiya, yaradıcılıq və bazardakı boşluqları görmək bacarığı ilə əlaqədardır. Bu növ sahibkarlıqda əsas məqsəd yeni məhsul və ya xidmət təqdim edərək bazarda fərqlilik yaratmaqdır. Gənclər, xüsusilə texnologiya və rəqəmsal sahəyə maraq göstərənlər, daha çox ideya yönümlü biznes qurmağa üstünlük verirlər. Bu isə startap ekosisteminin formalaşmasına, rəqabət mühitinin güclənməsinə və ölkənin innovativ potensialının artmasına səbəb olur.
Gənclərin sahibkarlığa marağını ölçmək üçün bir sıra göstəricilər mövcuddur. Bunlara startap layihələrinin və biznes planlarının sayı, gənclərin inkubasiya və akselerasiya proqramlarına qoşulma faizi, innovativ layihələrin kommersiyalaşdırılma dərəcəsi və maliyyə savadlılığı daxildir.
Nəticə etibarilə, gənclərin sahibkarlığa marağı həm ehtiyac, həm də ideya ilə müəyyən olunur. Lakin müasir iqtisadiyyatın dayanıqlığı və rəqabət qabiliyyətinin artırılması baxımından ideya əsaslı sahibkarlığın dəstəklənməsi daha önəmlidir. Bunun üçün dövlət və özəl sektorun birgə proqramları-biznes inkubatorları, güzəştli kreditlər, vergi imtiyazları və təlim layihələri-mühüm rol oynayır".
Bütün xəbərlər Facebook səhifəmizdə
USD
EUR
GBP
RUB