Müsabiqə üzrə üç filmin çəkilişi başa çatıb. Belə ki, keçən il Mədəniyyət və Turizm Nazirliyi gənc kinematoqrafçılara dəstək məqsədilə "Bu meydan, bu ekran" kino layihələri müsabiqəsini keçirib və müsabiqəyə prodüser mərkəzləri, kino şirkətləri tərəfindən təqdim olunan 51 layihə arasında 3 layihə qalib elan edilib.
SİA-nın məlumatına görə, artıq "Cinema" Gənc Kinematoqrafçılar Mərkəzinin "Gözlərimə gün düşür", "Sinema evi" MMC-nin "Mənim atam", "Ayan-Z" MMC-nin "Şəbəkə" filmləri hazırdır. Filmlər Mədəniyyət və Turizm Nazirliyinə təhvil verilib. Filmlərin rejissorları ilə əlaqə saxlayıb ekran əsərləri və onlar haqqındakı məlumatları sizlərə təqdim edirik:
İlk film "Gözlərimə gün düşür" ekran əsəridir. Filmin rejissoru Fehruz Şamıyevdir. Filmin əsas mövzusu Qarabağda doğulan və uşaqlıq illərini orada keçirən professorun həyatından, onun ömrünün son günlərindən bəhs edir. Öləcəyini hiss edən professor öz ata-baba yurdunda canını torpağa tapşırmaq istəyir. Lakin onun yurd yeri erməni işğalı altındadır. Buna baxmayaraq professor cəbhə xəttini keçərək doğma torpağa gedib çıxır və... orada dünyasını dəyişir.
Ümumiyyətlə, film süjeti və Qarabağ hadisələrinə yanaşma tərzi ilə bu vaxta qədər çəkilən qısametrajlı filmlərdən fərqlənir. Filmin çəkilişləri Şamaxı, Ağsu və Bakıda aparılıb. "Gözlərimə gün düşür" filminin ssenari müəllifləri Elçin Hüseynbəyli, Tünzalə Babayeva, Aygün Aslanlı, bəstəkarı Firudin Allahverdi, rejissor və prodüseri Fehruz Şamıyevdir. Baş rolların ifaçısı Qabil Əliyev (Lənkəran Dram Teatrının aktyoru) və Rauf Şahsuvarovdur (Şuşa Dövlət Musiqili Dram Teatrı).
İkinci film isə "Şəbəkə"dir. Filmin rejissoru Kəmalə Rzayevadır. Filmin əsas mövzusu sevgidir. Hər bir insanın uşaqlıq həyatında baş verənlər onun gələcək həyatında da təsirsiz ötüşmür. Hər kəsin bir sirri olduğu kimi bu filmin də baş qəhrəmanının arzuları və sirri var. Filmin ssenari müəllifi Səbinə Hüseynli, rejissoru Kəmalə Rzayeva, prodüseri Zemfira Babayevadır. Filmin əsas qəhrəmanlarını Xalq artisti Əbdül Mahmudbəyov, Əməkdar artist Mehriban Xanlarova, Dövlət Rus Dram Teatrının aktrisası Həcər Ağayeva, Pantomim Teatrının aktrisası Nargilə Qəribova ifa edib.
Üçüncü isə "Mənim atam" filmidir. Filmin ssenari müəllifi və prodüseri Elçin Musaoğludur.
Film həyat yoldaşını itirən və balaca oğlu ilə tək yaşayan jurnalist haqqındadır. Dürüst və vicdanlı bir həyat yaşayan jurnalist bütün çətinliklərə baxmayaraq qələminə xəyanət etmir. Hətta maddi çətinliklər yaşamasına baxmayaraq, ona təklif olunan rüşvətdən imtina edir və övladını böyüdür.
Filmin ssenari müəllifi və prodüseri Elçin Musaoğlu, rejissoru Novruz Hikmət, operatoru Mətləb Yaquboğludur. Rollarda Rövşən İsayev, Cavad Abbaslı, Oksana Rəsulova, Teymur Məmmədov çəkiliblər.
Onu da qeyd edək ki, "Sinema Evi" prodüser şirkətində çəkilən "Mənim atam" qısametrajlı filmi aprelin 24-28-də İranda keçirilən Kiş Beynəlxalq Film Festivalının müsabiqəsində ikinci mükafata layiq görülüb.
Bütün xəbərlər Facebook səhifəmizdə
USD
EUR
GBP
RUB