Sumqayıt Dövlət Dram Teatrının 50-ci mövsüm açılışı olub. SİA teatrdan verilən məlumata görə, açılış mərasimində çıxış edən direktor əməkdar artist Mübariz Həmidov teatrın keçdiyi 50 illik şərəfli yola nəzər salaraq növbəti mövsümdə reallaşacaq layihələri vurğulayıb, 50 illik yubileylə bağlı hazırlıq prosesindən söz açıb.
Direktor Azərbaycan Respublikası Prezidentinin mədəniyyətə, teatra qayğısının, həmçinin Şəhər İcra Hakimiyyətinin başçısı Zakir Fərəcovun bu sahəyə diqqətinin yeni yaradıcılıq uğurlarına rəvac verdiyini bildirib. Teatrın baş rejissoru xalq artisti Firudin Məhərrəmov nitqində Sumqayıt Dövlət Dram Teatrının vətənpərvərlik tərbiyəsində, maarifləndirmədə, bədii-estetik zövqün formalaşmasında önəmli rol oynadığına diqqət çəkib.
Daha sonra 1937-ci il repressiya qurbanlarının, əsasən də görkəmli Azərbaycan dramaturqu, romantizmin və mənzum dram janrının banisi Hüseyn Cavidin taleyindən bəhs edən (N.Muradoğlu) “Zülmətdə nur” tamaşası nümayiş etdirilib.
Səhnə əsərində habelə, məşhur Azərbaycan ziyalıları- dövrünün tanınmış şairləri Əhməd Cavad, Mikayıl Müşfiq və onların həyat yoldaşlarının çəkdiyi repressiya əzablarından səhnələr də yer alıb. Zamanın ağır durumuna, məhbus həyatının fiziki və mənəvi işgəncələrinə məruz qalan bu insanlar son ana qədər öz işıqlı ideyalarına sadiq qalırlar.
Tamaşada ölüm hökmündən xoflanaraq şair dostlarını güdaza verən müxtəlif tiplər də mütəmadi olaraq ifşa predmetinə çevrilir. İnsan donuna girmiş iblis obrazı tamaşa boyu qəhrəmanları qarabaqara izləyərək dramatizmi daha da artırır və Hüseyn Cavidin məşhur “İblis nədir?” sualını tamaşaçı üçün açıq saxlayır.
Tamaşa ulu öndər Heydər Əliyevin Naxçıvanda Hüseyn Cavid məqbərəsi önündəki tarixi çıxışının səslənməsi ilə sona yetir və zülmətdə nur kimi parlayanların ruhları səhnədə canlanır.
Xalq artisti Firudin Məhərrəmovun quruluş verdiyi tamaşada obrazları əməkdar artistlər İzaməddin Bağırov, Rauf Ağakişiyev İlahə Səfərova, Cəlal Məmmədov, aktyorlar Habil Xanlarov, Şəhla Məmmədova, Sədaqət Nuriyeva, Oktay Mehdiyev, Şəmistan Süleymanlı, Dağlar Rüstəmov, İlham Səfərli, İlahə Səfərova, Akif Mirzəyev, Rövşad İlyasov və Rövşən Əsgərov canlandırır.
Bütün xəbərlər Facebook səhifəmizdə
USD
EUR
GBP
RUB