Novruz bayramının gəlişinə sayılı günlər qalıb. Azərbaycan Dövlət Gənc Tamaşaçılar Teatrının mətbuat xidmətindən SİA-ya verilən xəbərə görə, teatrın repertuarına əlavə olunan yeni, maraqlı səhnə əsərləri balaca tamaşaçılarımıza əsl bayram əhval ruhiyyəsi bəxş edəcək.
Məşqlərinə ötən ay başlanılan rus xalq nağılı "Turpun nağılı"nın motivləri əsasında səhnələşdirilmiş "Möcüzəli turpun nağılı" tamaşası Novruz bayramı ərəfəsində və bayram günlərində azyaşlı dostlarımıza xoş anlar yaşadacaq. Premyerası martın 18-də saat 12.00 və 14.00-da olacaq yeni səhnə əsərinin quruluşçu rejissoru Elşən Zeynallı, quruluşçu rəssamı Elşən Sərxanoğlu, bəstəkarı Rüfət Ramazanov, rejissor assisenti Sona Mustafayeva, rəqslərin quruluşçusu Vüsal Mehrəliyevdir.
Tamaşada əməkdar artistlər Qəmər Məmmədova, Vahid Əliyev, aktyorlar Xalidə Əliməmmədova, Zümrüd Quliyeva, Asya Atakişiyeva, Sevinc Mehrəliyeva, Zülfiyyə Alhüseynova, Elnur Hüseynov, Mirzəağa Mirzəyev, Anar Səfiyev, Elnur Əliyev iştirak edəcəklər.
Novruz bayramı günlərində Azərbaycan Dövlət Gənc Tamaşaçılar Teatrında Dünya Uşaq və Gənclər Teatr günü də qeyd ediləcək. Bu münasibətlə teatrda martın 18-dən – 25-dək "Tamaşaların paradı" adı ilə maraqlı repertuar tərtib edilib.
Bayram günlərində balaca dostlarımız "Möcüzəli turp" ilə yanaşı, A.Şaiqin "Tıq-tıq xanım", P.Nurəliyevanın "Dəcəl keçi", "Qoğalın nağılı" tamaşalarını da izləyə biləcəklər.
Tamaşalardan əvvəl Novruzun əsas personajları – Kosa və Keçəl tamaşaçılarımızı Novruz haqqında şeirlər, mahnılarla salamlayacaqlar. Daha sonra isə tamaşalar nümayiş olunacaq.
Bayramı maraqlı keçirmək istəyən hər kəsi Dövlət Gənc Tamaşaçılar Teatrına və bayram tamaşalarımıza dəvət edirik. Tamaşalar martın 18-dən 25-dək davam edəcək.
Qeyd edək ki, biletləri şəhərimizin bütün mərkəzləşdirilmiş kassalarından, "Asan" xidmət mərkəzlərindən, eləcə də, Dövlət Gənc Tamaşaçılar Teatrının kassalarından əldə edə bilərsiniz.
Bütün xəbərlər Facebook səhifəmizdə
USD
EUR
GBP
RUB