11 mart 2016-cı il tarixində Mədəniyyətşünaslıq üzrə Elmi-Metodiki Mərkəz tərəfindən "Nizami poeziyası musiqidə" mövzusunda Üzeyir Hacıbəyli adına Bakı Musiqi Akademiyasının Qara Qarayev zalında elmi konfrans keçirilmişdir. Konfransı Bədii təhsil şöbəsinin müdiri Natiq Mustafayev açaraq sözü Mədəniyyətşünaslıq üzrə Elmi-Metodiki Mərkəzin elmi katibi Hüseyn İbrahimova vermişdir.
Tədbirdə Üzeyir Hacıbəyli adına Bakı Musiqi Akademiyasının professoru, fəlsəfə elmləri doktoru Gülnaz Abdullazadə "Azərbaycan bəstəkarların yaradıcılığında Nizami mövzusu", fəlsəfə elmləri doktoru Əminə Abbasova "Nizami poeziyasında musiqinin vəsfi", sənətşünaslıq üzrə fəlsəfə doktoru Səadət Təhmirazqızı "Fikrət Əmirov yaradıcılığında Nizami poeziyası", sənətşünaslıq üzrə fəlsəfə doktoru Jalə Qulamova "Nizami Gəncəvinin "Yeddi gözəl" poeması və Qara Qarayevin "Yeddi gözəl" baleti", sənətşünaslıq üzrə fəlsəfə doktoru Afaq Qəniyeva "Nizami poeziyası Azərbaycan romanslarında" mövzularında məruzələrlə çıxış etmişlər.
Konfransda respublikanın əməkdar artisti Gülnaz İsmayılovanın ifasında Cahangir Cahangirovun "Gül camalın", Fikrət Əmirovun "Gülüm" romansları və xanəndə Hüseyn Məlikovun ifasında "Şur" və "Rast" muğamları səsləndi.
Sonda görkəmli bəstəkar Qara Qarayevin "Yeddi gözəl" baletindən video fraqmentlər nümayiş etdirildi.
Bütün xəbərlər Facebook səhifəmizdə
USD
EUR
GBP
RUB