Azərbaycan Dövlət Musiqili Teatrında 106-cı teatr mövsümünün növbəti premyerası olacaq. Qurumun Mətbuat xidmətinin rəhbəri Samir Sədaqətoğlunun SİA-ya verdiyi məlumata görə, yeni uşaq tamaşası olan "Qızıl cücə" səhnələşdiriləcək. Teatrın rus bölməsi tərəfindən hazırlanan səhnə əsəri tamaşaçılara 27 fevral saat 12.00-da təqdim olunacaq. Yeni nağıl-tamaşanın müəllifləri V. Ulyanovskiy və V. Orlov, quruluşçu-rejissoru Azərbaycan Respublikasının Əməkdar artisti Svetlana Bulaxdır.
S.Bulax tamaşa haqqında fikirlərini bildirib: "Tamah, var-dövlət hərisliyi, yalan, hiyləgərlik çox böyük faciələrə səbəb olur. Əsl sevgi bütün nadanlıqlara və qəddarlıqlara qalib gəlir. "Qızıl cücə" nağıl-tamaşasının verdiyi mesaj da məhz bu qəbildən olan mətləblər haqqındadır. Bu tamaşanı səhnələşdirməkdə məqsədimiz təkcə uşaqları əyləndirmək deyil, həm də onların intellektual inkişafına yardımçı olmaqdır. İnanıram ki, "Qızıl cücə" əsəri balaca tamaşaçılarımızın böyük marağına səbəb olacaq".
Qeyd edək ki, yeni səhnə əsərinin rejissor-assistenti Tamilla Aslanovadır. Tamaşada rolları Əməkdar artist Svetlana Bulax, aktyorlar Marina Litvinenko, Emil Heydərov, Mehriban Zalıyeva, Rauf Babayev, Gülnarə Kərimbəyova, Yuliya Heydərova, Gülnarə Əzizova, Murad Əliyev, Roman Krasnov və Cəlalə Novruzlu canlandıracaqlar.
Bütün xəbərlər Facebook səhifəmizdə
USD
EUR
GBP
RUB