Quba tarix-diyarşünaslıq muzeyinin yeni binasının açılış mərasimi olacaq. SİA-nın verdiyi məlumata görə, 2 may tarixində Quba şəhərində yerləşən Quba Tarix-Diyarşünaslıq Muzeyinin açılış mərasimi keçiriləcək.
XX əsrin I yarısında Azərbaycanda təşkil olunan muzeylərdən biri də Quba tarix muzeyidir. İlk muzey 1924-cü ildə "Cami" məscidinin mədrəsəsində Quba ziyalılarının təşəbbüsü ilə yaradılıb. Xalq Maarif Komissarlığının 14 may 1935-ci il əmri ilə Çələbizadə Əhməd Əbdürrəhman oğlu Quba tarix muzeyinə müdir təyin olunur. 1937-ci ildə Əhməd əfəndi repressiya qurbanı olur, muzey bağlanır.
1943-cü ildə Quba ictimaiyyəti tarix muzeyinin açılması ilə bağlı Mərkəzi Komitəyə məktubla müraciət edir. Azərbaycan SSRİ Xalq Komissarları Sovetinin 04.21.1943-cü il tarixli əmri ilə Qubada muzeyin yaranması haqqında qərar qəbul edilir. Muzey 1944-cü ilin avqust ayında görkəmli alim və mütəfəkkir, şair A.A.Bakıxanovun yaşadığı indiki Ərdəbil küçəsi 93 saylı binada fəaliyyətə başlayır.
XIX əsrin əvvəllərində tikilən bu bina Azərbaycan SSRİ Nazirlər Sovetinin 14 may 1981-ci il nömrə 225 saylı qərarı ilə tarixi abidə kimi qeydə alınıb.
1943-1958-ci illər Azərbaycan Elmlər Akademiyasının baza muzeyi kimi, 1958-1965-ci illər ictimai əsaslarla, 1965-ci ildən Azərbaycan Mədəniyyət Nazirliyinin tabeçiliyində fəaliyyət göstərir.
Muzeyin əsas və köməkçi fondunda on mindən (10 000) çox eksponat qorunub saxlanılır.
Uzun illər istifadə olunan muzeyin son 4 zalı qəzalı vəziyyətdə olduğu üçün 05.05.2010-cu il tarixdən Mədəniyyət və Turizm Nazirliyi tərəfindən muzey ekspozisiyası tamaşaçılar üçün bağlanıb.
Azərbaycan Respublikası Mədəniyyət və Turizm Nazirliyi tərəfindən 2012-ci ildə Quba şəhərində "Nizami" adına parkın ərazisində yeni, müasir standartlara uyğun muzey binasının tikintisinə başlandı. 2014-cü ildə binanın inşası tam başa çatdırılmış, ekspozisiyalarda tərtibat işləri aparılmışdır. Binanın ümumi sahəsi 1620 kv.m. 1 zirzəmi 3 mərtəbədən ibarətdir.
Bütün xəbərlər Facebook səhifəmizdə
USD
EUR
GBP
RUB