Bu gün Bakı Musiqi Akademiyasında bəstəkar, xalq artisti, professor Nəriman Məmmədov ilə vida mərasimi keçirilib. SİA-nın verdiyi məlumata görə, mərasimdə çıxış edən mədəniyyət və turizm naziri Əbülfəs Qarayev Nəriman Məmmədovun 1927-ci il dekabr ayının 28-də Naxçıvan şəhərində anadan olduğunu diqqətə çatdırıb. Bildirib ki, bəstəkar kiçik yaşlarından musiqinin vurğunu olub: "Asəf Zeynallı adına Bakı Musiqi Texnikumunun xalq çalğı alətləri və musiqi nəzəriyyəsi şöbələrini bitirən Nəriman bu illə xalq çalğı alətləri üçün "Suita"sını bəstələyir. Suita görkəmli bəstəkar və dirijor Səid Rüstəmovun rəhbərlik etdiyi xalq çalğı alətləri orkestrinin ifasında səslənib. O, təhsilini davam etdirərək Üzeyir Hacıbəyov adına Azərbaycan Dövlət Konservatoriyasının tarix nəzəriyə, sonralar isə bəstəkarlıq şöbələrini uğurla bitirib. O, yeddi simfoniyanın müəllifidir. Bunlardan ikisi proqramlı əsərlərindəndir. 3-cü simfoniya orqan üçün yazılmış və Riqada müvəffəqiyyətlə səslənib. Dördüncü simfoniya Hüseyn Cavidə, 7-ci simfoniya Xocalı faciəsinə həsr olunub. Onun yeddi konsertindən dördü fortepiano ilə simfonik orkestr, 7-ci konsert fleyta ilə orkestr üçün yazılıb. Fortepiano üçün yazdığı konsertlərin ikisi Moskva radiosunun fondunda saxlanılır. Nəriman Məmmədov bir neçə simfonik poema, kamera orkestri üçün pyeslər və instrumental əsər-kvartet, trio və sonata bəstələyib. Onun yaradıcılığında mahnı janrı da xüsusi yer tutur. Nəriman Məmmədovun 700-ə yaxın mahnısı Azərbaycanın görkəmli müğənnilərinin ifasında lentə yazılıb. Müəllif mahnılarının mətnləri üçün şairlərdən Rəaul Rza, Bəxtiyar Vahabzadə, Fikrət Qoca, R.Heydər, R.Muxtar, Nüsrət Kəsəmənli, R.Abdullayev, Musa Urud və Xuraman Vəfanın sözlərinə müraciət edib".
Bəstəkarlar İttifaqının sədri Firəngiz Əlizadə söz alaraq Nəriman Məmmədovun Hüseyin Cavidin "Şeyx Sənan" baleti üzərində işini başa çatdırdığını diqqətə çatdırıb: "Musiqili komediyaları – "Altı qızın biri Pəri", "Məmmədəli kurorta gedir", "Qız görüşə tələsir" (Tofiq Bakıxanovla birgə) və eləcə də dördüncü musiqili komediya "Olacağa çarə yoxdur" (Ramiz Abdullayevin librettosu əsasında) bəstəkarın uğurlarındandır".
Daha sonra digər natiqlər də söz alaraq mərhumun yaxınlarına başsağlığı verib, onunla bağlı xatirələrini bölüşüblər.
Qeyd edək ki, xalq artisti Nəriman Məmmədov bu gün II Fəxri Xiyabanda dəfn edilir.
Bütün xəbərlər Facebook səhifəmizdə
USD
EUR
GBP
RUB