17 mart tarixində Rusiya Federasiyasının Moskva şəhərində keçiriləcək "2nd Condé Nast Traveller Luxury Travel Fair" turizm sərgisində Azərbaycan Respublikası Mədəniyyət və Turizm Nazirliyi tərəfdaş qismində iştirak edəcək. SİA-nın verdiyi məlumata görə, tədbirdə ölkəmizi Azərbaycan Respublikasının mədəniyyət və turizm naziri Əbülfəs Qarayevin rəhbərlik etdiyi geniş nümayəndə heyəti təmsil edəcək.
Nümayəndə heyətinin tərkibinə Azərbaycan Konqreslər Bürosu, Azərbaycan Turizm Assosiasiyası, "Gilan tourism", "İmprotex travel", "Khazar travel" turizm şirkətləri, "Absheron hotel Group", "Caspian Sea Resort hotel", "Chinar Hotel and Spa Naftalan", "Divan Express Baku", "Excelsior Hotel and Spa Baku", "Fairmont Baku", "Four Seasons hotel Baku", "Hilton Baku", "Hyatt Regency Baku", "JW Marriott Absheron Baku", "Kempinski hotel Badamdar", "Pik Palace Shahdag hotel", "Qafqaz Hotels and Resorts", "Rixos hotel Azerbaijan", "Rixos hotels Group" və "Sapphire hotel" mehmanxanaları daxil edilib.
Sərgidə iştirakla bağlı ümumilikdə Azərbaycan üçün 304 kv.m sahə ayrılmış və sərgiyə gələn qonaqlara təqdim olunması üçün ingilis və rus dillərində müxtəlif reklam-çap məhsulları ilə təmin olunub.
Azərbaycanın tərəfdaş ölkə qismində iştirak etməsi ilə əlaqədar tədbirin dəvətnamələrində, rəsmi elektron poçt yazışmalarında, döş nişanlarında və reklam lövhələrində Azərbaycan turizminin loqosunun, 6 ay ərzində tədbirin www.cntfair.com rəsmi internet səhifəsində Azərbaycanın turizm potensialına dair banerin yerləşdirilməsi, həmçinin, ölkəmizin turizm potensialına dair reklam çarxlarının nümayişi təşkil olunub. Bununla yanaşı tədbir zamanı işgüzar görüşlərin təşkili, ölkəmizin milli mətbəx və mədəniyyətinin nümayişi dənəzərdə tutulub.
Məlumat üçün bildiririk ki, "Condé Nast Traveller Luxury Travel Fair" sərgisi dünyanın aparıcı nəşriyyat evi Condé Nast tərəfindən təşkil olunan ilk qlobal lüks ticari səyahət sərgisidir. "Condé Nast Traveller Luxury Travel Fair" sərgisi Şərqi Avropada BMÜTT tərəfindən tanınan ilk qlobal lüks ticari səyahət sərgisidir. Ötən il adıçəkilən sərgidə 41 ölkədən 144 şirkət iştirak edib.
Bu il sözügedən sərgidə Azərbaycanla yanaşı Rusiya, Ukrayna, Belorusiya, Gürcüstan, Ermənistan, Qazaxıstan, Litva, Latviya, Estoniya kimi ölkələr də iştirak edəcək.
Bütün xəbərlər Facebook səhifəmizdə
USD
EUR
GBP
RUB