Türkmənistanın Aşqabad şəhərində türkmən xalqının böyük mütəfəkkiri Məhtumqulu Fəraqinin 290 illik yubileyi münasibətilə "Məhtumqulu Fəraqi. Ümumbəşəri mədəni dəyərlər" mövzusunda beynəlxalq elmi konfrans öz işinə başlayıb. SİA-nın məlumatına görə, konfransda beynəlxalq elm mərkəzlərindən, Avropa və Asiya ölkələrindən, MDB dövlətlərindən elm, mədəniyyət və incəsənət xadimləri, məhdumquluşünaslar iştirak edirlər.
Konfransda Azərbaycanı mədəniyyət və turizm naziri Əbülfəs Qarayevin rəhbərliyi ilə nümayəndə heyəti təmsil edir. Azərbaycanın Rusiyadakı səfiri Polad Bülbüloğlu, Yazıçılar Birliyinin sədri Anar Rzayev, Azərbaycan Milli Elmlər Akademiyasının vitse-prezidenti İsa Həbibbəyli də tədbirdə iştirak edirlər.
Konfransda Məhtumqulu Fəraqinin yaradıcılıq irsinin öyrənilməsi və təbliğində böyük xidmətlərinə görə Polad Bülbüloğlu və Firuzə Ağayeva "Məhtumqulu Fəraqi" medalı ilə təltif olunublar.
Səfər çərçivəsində Azərbaycan nümayəndə heyəti Türkmənistan Prezidenti Qurbanqulu Berdiməhəmmədov, Türkmənistan Nazirlər Kabineti sədrinin müavini Maisa Yazmuhammedova və mədəniyyət naziri vəzifəsini icra edən A.Qaracayevlə görüşüblər.
Görüşdə ölkələrimiz arasında mədəni əlaqələrin genişləndirilməsi və daha da dərinləşdirilməsinin vacibliyi vurğulanmış, bu istiqamətdə əməkdaşlığın gələcəkdə də inkişaf etdirilməsi imkanları müzakirə olunub.
Konfrans iştirakçılarının Marı (Merv) vilayətinə səfəri və bir sıra tarixi yerlərə ziyarəti də nəzərdə tutulubr.
Qeyd edək ki, Azərbaycan nümayəndə heyətini Türkmənistandakı səfir Vəhdət Sultanzadə müşayiət edir.
Bütün xəbərlər Facebook səhifəmizdə
USD
EUR
GBP
RUB