Şəki rayonunun Daşüz kəndində yerləşən Respublika Atçılıq Turizm Mərkəzində Azərbaycan xalqının ümummilli lideri Heydər Əliyevin xatirəsinə həsr olunmuş milli atüstü oyunlar festivalı başlayıb. SİA-nın məlumatına görə, Mədəniyyət və Turizm Nazirliyinin və Şəki Şəhər İcra Hakimiyyətinin birgə təşkilatçılığı ilə keçirilən festivalda Bakı, Şəki, Yevlax şəhərlərini, Balakən, Zaqatala, Qax, Oğuz, Qəbələ, İsmayıllı, Ağcabədi, Ağdam, Ağstafa, Goranboy, Laçın və Xaçmaz rayonlarını təmsil edən 16 komanda iştirak edir. Bakı şəhəri festivalda "Sərhədçi" və "Polad" komandaları ilə təmsil olunub.
Mərasimdə bildirilib ki, Mədəniyyət və Turizm Nazirliyinin müvafiq əmri ilə 2006-cı ildə yaradılmış Respublika Atçılıq Turizm Mərkəzində 2007-ci ildən başlayaraq hər il may ayında ümummilli lider Heydər Əliyevin xatirəsinə həsr olunmuş milli atüstü oyunlar festivalı, dekabrda isə "Prezident Kuboku" uğrunda çövkən milli oyunu üzrə yarışlar keçirilir. Ənənəvi olaraq keçirilən bu yarışlar xalqımızın mədəni irsi olan milli atüstü oyunların qorunub saxlanması, qədim atçılıq ənənələrinin bərpası, habelə ölkəmizdə atçılıq turizminin təbliği və inkişaf etdirilməsi məqsədi daşıyır.
Diqqətə çatdırılıb ki, yarışların coğrafiyası da ildən-ilə genişlənir, getdikcə daha kütləvi xarakter alır. İlk vaxtlar yarışlarda 6-8 komanda iştirak edirdisə, bu ilki festivalda komandaların sayı artıq 16-ya çatıb.
Bildirilib ki, mayın 7-dək davam edəcək festivalda komandalar çövkən, sürpapaq, papaq və yaylıq oyunları üzrə yarışacaqlar. Festival çərçivəsində iştirakçılar üçün çövkən oyunu üzrə ustad dərslərin keçirilməsi də nəzərdə tutulub.
Musiqi nömrələrindən sonra komandalar cəngi sədaları altında meydana daxil olublar.
Sonra tamaşaçılar çövkən milli oyunu üzrə Şəki və Ağcabədi komandalarının oyununu izləyiblər. Maraqlı keçən oyun Ağcabədi komandasının qələbəsi ilə başa çatıb.
Bir gün əvvəl keçirilmiş seçmə oyunlarda isə aşağıdakı nəticələr qeydə alınıb: Yevlax-Goranboy - 3:0, Oğuz-Qəbələ - 1:0, İsmayıllı-Xaçmaz - 5:0, Qax-Zaqatala - 2:1, Ağcabədi-Yevlax - 2:0, Balakən-Oğuz - 3:1.
Qeyd edək ki, çövkən milli oyunu üzrə final qarşılaşması və festivalın təntənəli bağlanış mərasimi mayın 7-də keçiriləcək.
Bütün xəbərlər Facebook səhifəmizdə
USD
EUR
GBP
RUB