Martın 31-dən aprelin 27-dək "YARAT" Müasir İncəsənət Məkanının təşkilatçılığı ilə Bakıda Cahangir Səlimxanovun "Yaradıcı qüvvəni hərəkətə gətir(ək)" mövzusunda ustad dərsləri təşkil olunacaq. SİA-nın məlumatına görə, ilk addımlarını musiqişünaslıqda atmış, sonralar isə incəsənətin müxtəlif növləri və mədəniyyətin sahələrinə aid onlarla layihələrə imza atmış Cahangir Səlimxanov həmkarları arasında "yeni fikirlər dəryası", başqalarını yaradıcı ideyalara sövq etmək və şövqləndirmək əzmində olan, hətta yeni yaranan cərəyan, yaxud gizli imkana işarə edə bilən şəxs kimi rəğbət qazanıb.
Onun reallaşdırdığı ideyalar arasında Hindistanda ilk dəfə nümayiş etdirilən iki ənənəvi musiqi mədəniyyətini qovuşduran konsert proqramından tutmuş qədim qayaüstü rəsmlərdə bərpa olunmuş balet tamaşasınadək, Şimalı Avropanın beş ölkəsindən olan təsviri sənət ustalarına sifariş olunmuş Bakının ətraflarındakı mədəniyyət evləri üçün "public/community art" əsərlərində teatrda gender mövzusuna həsr edilmiş festivaladək rast gəlmək olar.
Təlim kursunun əsas mövzu dairəsi bədii yaradıcılıqdır. Lakin yaradıcı düşüncə və əməl anlamlarının daha geniş yozumuna yer verildikdə, bu səpkili təcrübə hər bir peşə sahibi üçün faydalı görünə bilər. Şəxsi, şəxslər arası və şəxsdənkənar yaradıcı proseslərin müxtəlif müstəviləri sərbəst və zövqverici tərzdə təhlil olunacaqdır.
Kurs qrupun tərkibindən asılı olaraq Azərbaycan və rus dillərində aparıla bilər. İştirakçılar mühazirələri hər iki dildə qavramağa hazır olmalıdırlar. Bununla belə fərdi məşğələlərdə seçim hər tələbənin dil bacarığı səviyyəsinə müvafiq olaraq təyin ediləcək.
Yaşı 18-36 arasında, istənilən fəaliyyət sahəsi və peşəkar istiqaməti olan, təxəyyülünü sərbəst ifadə etməyə, fərdi yaradıcılıq məhsulu və birgə təcrübələr barədə müasir mülahizələri öyrənməyə hazır və innovativ ideya və həlləri formalaşdırmağa və ifadə etməyə meylli gənclər kurslarda iştirak edə bilərlər. Seçilmiş tələbələrdən kurs boyu fərdi bloqlarını, böyük həcmdə ədəbiyyatla (əsasən, ingilis dilində) tanış olaraq icmal yazmaq və kursun fəaliyyəti ilə paralel hazırlanan və genişləndirilən internet saytı üçün öz materiallarını vermək tələb olunacaq.
Kurs iştirakçılarının fərdi bloqlarından və eynilə dörd həftəlik məşğələdə verilmiş tapşırıqlar əsasında ərsəyə gələcək sənət əsəri (və ya tədbir, innovativ sosial təşəbbüs, satış məhsulu) ideyalarını özündə ehtiva edən veb-saytın yaradılması nəzərdə tutulur. İnternet məkanında yerləşdirilən belə "ideyalar bazarı" həm marağında olan yeni tərəfdaşlar, həm də kurs iştirakçıları arasında sonrakı əməkdaşlığın inkişafına şərait yarada bilər. Yenicə işlənib-hazırlanmış ideyalar toplusundan olan təkliflərin həmişə yeni istedadların yolunu gözləyən "YARAT"ın dəstəyi və tanıdılması da istisna olunmur.
Kurslar üçün martın 20-dək qeydiyyata yazılmaq olar.
Yalnız seçilmiş namizədlər müsahibəyə dəvət ediləcəklər.
Qeyd edək ki, seçilmiş iştirakçılara kursun başlanma tarixinədək nəzərdən keçirilməsi tələb olunan bəzi materiallar (oxu materialları, videofilmlər, veb-saytlar) təqdim ediləcək.
Bütün xəbərlər Facebook səhifəmizdə
USD
EUR
GBP
RUB