British Council Azərbaycan nümayəndəliyi böyük məmnuniyyətlə Azərbaycan Respublikası Mədəniyyət və Turizm Nazirliyi ilə əməkdaşlığı çərçivəsində Azərbaycan Dövlət Gənc Tamaşaçılar Teatrının səhnəsində Oskar mükafatına layiq görülmüş dramaturq Martin MakDonaxın pyesi əsasında hazırlanmış "Lineyn trilogiyası" ( üç tamaşa bir gündə, amma müxtəlif saatlarda) tamaşasının premyerasını elan edir. SİA-nın verdiyi xəbəər görə, bu tamaşalar, Böyük Britaniya mütəxəssislərinin iştirakı ilə keçirilən təlim proqramı vasitəsilə Azərbaycanın dövlət və özəl teatrlarında çalışan aktyorların və texniki heyətin peşəkar bacarıq və imkanlarını artırmaq üçün nəzərdə tutulan "Teatr əməkdaşlığı" layihəsi çərçivəsində hazırlanır.
Nəzərinizə çatdıraq ki, 2013-cü ilin fevral ayından başlayaraq, British Council Azərbaycan Dövlət Gənc Tamaşaçılar Teatrının bazasında Böyük Britaniyadan dəvət olunmuş peşəkar işıq rəssamı Maykl Manyon, quruluşçu rəssam Elizabet Kuk və peşəkar teatr rejissoru Yan Uilem Van Den Box kimi mütəxəssislərin iştirakı ilə müxtəlif təlimlər silsiləsini təşkil edir. Dramaturq Martin MakDonaxın qələminə aid "Lineyn trilogiyası" özündə üç pyesi –"Lineynin Gözəllik Kraliçası", "Konnemarada bir Kəllə" və "Yalqız Qərb" - birləşdirir.. 1994- ci ildə, "Lineynin Gözəllik Kraliçası" və "Yalqız Qərb", "Ən Yaxşı Pyes" nominasiyasında "Tony Award" mükafatına layiq görülüb. Böyük Britaniyadan dəvət olunmuş teatr rejissoru Yan Uilem Van Den Box, azərbaycanlı rejissorlarımız Ayla Osmanova, Sərvər Əliyev, Gülnar Hacıyeva və on iki Azərbaycan aktyoru ilə Bakıda - Azərbaycan Dövlət Gənc Tamaşaçılar Teatrında bu üç qara komediyanın səhnələşdirilməsi prosesinə bədii rəhbərlik edir. Azərbaycanda fəaliyyət göstərən British Council nümayəndəliyinin direktoru Elizabet Uaytın sözlərinə görə, "bu işin əsas dəyəri ondadır ki, Bakının teatr peşəkarları və Böyük Britaniya rejissoru müasir Britaniya pyesini Azərbaycan kontekstində təqdim etmək üçün aylarla bərabər çalışıblar. Nəticəsi isə həm yeniliyi, həm də qeyri-adiliyi ilə seçilir".
Qeyd edək ki, trilogiyanın premyerası 11 mart 2014-cü il tarixində saat 12:00, 16:00 və 19:00-da Azərbaycan Gənc Tamaşaçılar Teatrında göstəriləcək. Tamaşalar Azərbaycan dilində oynanacaq və Azərbaycan Dövlət Gənc Tamaşaçılar Teatrının daimi repertuarına daxil ediləcək.
Bütün xəbərlər Facebook səhifəmizdə
USD
EUR
GBP
RUB