Akademik Opera və Balet Teatrında L.Minkusun "Don Kixot" baletinin tamaşası nümayiş olunub. SİA-nın məlumatına görə, tamaşada əsas partiyaları Belorus Milli Akademik Böyük Opera və Balet Teatrının solistləri Yekaterina Oleynik və Konstantin Kuznetsov ifa ediblər.
Balet tamaşasını Belorusun xalq artisti Vyaçeslav Voliç idarə edib. Anşlaqla baş tutan tamaşada Kitri rolunun ifaçısı Yekaterina Oleynik və Bazil rolunu ifa edən Konstantin Kuznetsovun yüksək ustalığı və professional səviyyəsi baletsevərləri heyran edib.
Tamaşadan sonra Kitri rolunun ifaçısı Yekaterina Oleynik çıxışından sonra fikirlərini bölüşüb: "Bizim teatrın bir çox aparıcı solistləri dəfələrlə Azərbaycan Opera və Balet Teatrının qonağı olub və Bakı səhnəsində çıxış ediblər. Onlar hər dəfə geri qayıdandan sonra qastrol səfərləri haqqında, necə səmimi qarşılandıqları, tamaşanın yüksək səviyyədə baş tutduğu, Azərbaycan balet truppası və orkestrin səviyyəsi haqqında yüksək fikirlər söyləyirdilər. Ona görə də Azərbaycan Opera və Balet Teatrının direktoru Akif Məlikovdan dəvət alarkən Konstantinlə mən dəvəti böyük məmnuniyyətlə qəbul etdik. Fikrimcə, biz yaxşı çıxış etdik. Tərəf müqabilimlə böyük məmnuniyyətlə rəqs edirdik. Tamaşaçılar öz alqışları ilə bizi daha da ruhlandırırdılar. Balet truppanız ilə qarşılıqlı təmas çox asanlıqla alındı. Professional və perspektivli truppanız – gözəl solistləriniz var. Bizim kolleqamız – Vyaçeslav Voliçin rəhbərlik etdiyi orkestrə "Bravo!" demək istərdim. Əsas təşəkkürümü isə səmimi və hərarətli qəbul, qastrol səfərimizin yüksək səviyyədə təşkili üçün teatrın direktoru Akif Məlikova bildirmək istərdim. Bakıya bir daha qayıtmaq və gözəl teatrınızda yenidən çıxış etmək ümidi və arzusu ilə şəhərinizi tərk edirəm".
Bütün xəbərlər Facebook səhifəmizdə
USD
EUR
GBP
RUB