“Çörəyin kiflənməsinə rütubət, isti hava və oksigen səbəb olur. Kifdən uzaq durmağın ən yaxşı yolu çörəyi nəmdən uzaq tutmaq, doğru qablaşdırmaqdır. Əgər uzunmüddətli saxlamaq istəyiriksə, dondurucudan istifadə etməliyik”.
Bu sözləri SİA-ya açıqlamasında təhlükəsiz qida eksperti Asim Vəliyev deyib.
O bildirib ki, çörək bişdikdən sonra soyuduqca ətrafdakı rütubəti çəkməyə başlayır:
“Çörəyi qoyduğumuz torbanın içində yaranan su buxarı kif göbələkləri üçün ideal mühitdir.
20 dərəcədən yuxarı temperatur kifin inkişafını sürətləndirir.
Həmçinin çörək açıqda qaldıqda havadakı kif sporları onun üzərinə qonur və çoxalır.
Bu baxımdan çörəyin kiflənməsinin qarşısını almaq üçün bir neçə məqama diqqət etməliyik. Çörək tam soyumadan onu sellofana qoymamalıyıq. Qoyduqda içəridə nəm yaradır və cəmi bir neçə saata kiflənməyə zəmin hazırlayır.
Qısa müddətli saxlama üçün kağız paketlər, təmiz kətan torbalar ən yaxşısıdır. Onlar çörəyin bir növ nəfəs almasına kömək edir.
Çörək qabını həftədə bir dəfə sirkəli su ilə silsək yaxşı olar. Sirkə turşusu kif sporlarını məhv edən təbii dezinfeksiyaedicidir. Əgər çörəyi 2-3 günə bitirə bilmirsiksə, onu dilimləyib dondurucuya qoya bilərik.
Çörək alarkən etiketdə kalsium propionat və ya sorbik turşusu yszılıbsa, demək bu çörək kiflərə qarşı kimyəvi qorunur.
Çörəyin üzərində kiçik bir yaşıl, ya qara nöqtə belə görsək, həmin hissəni kəsib atıb sonra istifadə etmək qəti olmaz. Kifin gözlə görünməyən kökləri çörəyin iç hissəsinə çoxdan artıq yayılıb. Bu köklər qaraciyər üçün zərərli olan mikotoksinlər ifraz edir. Kiflənmiş çörəyi dərhal tam şəkildə atmaq ən doğru təhlükəsiz addımdır”.
Ayşən Vəli
Bütün xəbərlər Facebook səhifəmizdə
USD
EUR
GBP
RUB
