“Azərbaycan məhkəmələrinə alimentin sabit pul məbləğində təyin edilməsi ilə bağlı müraciətlərin sayı artıb”-MÖVQE

Son vaxtlar Azərbaycan məhkəmələrinə alimentin sabit pul məbləğində təyin edilməsi ilə bağlı müraciətlərin sayı artıb. SİA-nın xəbərinə görə, bunu Ali Məhkəmənin hakimi Mehparə Əhmədova məlumat verib. O bildirib ki, ötən il respublika üzrə birinci instansiya məhkəmələrində alimentlə bağlı 1850 işə baxılıb, onlardan 1545-i təmin olunub: "Apellyasiya instansiya məhkəməlırində 378 işə baxılıb, 253 iş üzrə qətnamə qüvvədə saxlanılıb. Ali Məhkəmədə 75 işə baxılıb, 65 iş üzrə qətnamə qüvvədə saxlanılıb. Bu ilin 6 ayında isə Ali Məhkəmədə alimentlə bağlı 29 işə baxılıb 27 iş üzrə qətnamə qüvvədə saxlanılıb".

M.Əhmədova qeyd edib ki, qanuna görə, sabit pul məbləği cavabdehin əmlak vəziyyətindən asılı olmayaraq qazancının 1/4-i məbləğində müəyyən olunur. Onun sözlərinə görə, alimentin ödənilməsi ilə bağlı problemin həlli məqsədilə məhkəmələrin alimentin ödənilməsi ilə bağlı qərarları dərhal icraya yönəlməlidir. O bildirib ki, yeni qanunvericilikdə bu, ləğv olunaraq belə qərarlar qüvvəyə mindiyi vaxtdan icraya yönəldilir.


Alimentlə bağlı qərarların icrasında ciddi problemlərin olduğunu deyən hakim bunların bəziləri barədə ətraflı məlumat verib. Onun sözlərinə görə, borclu, yəni alimenti verən tərəf iş yerini, gəlirlərini, əmlakını gizlədir: "Bu da məhkəmə qərarlarının qəbulu zamanı ciddi problem yaradır. Müəyyən hallarda borclu işsiz olur, alimenti ödəyə bilmir. Bu da alimentin ödənilməsi ilə bağlı qərarın icrasında problem yaradır. Borclu iş yerinin, yaşadığı yerin ünvanını gizlədir, əmək haqqının cüzi hissəsini rəsmiləşdirir".


Daha sonra hakim Azərbaycanda Aliment Fondunun yaradılması təklif edib. Aliment Fondunun yaradılmasını vacib hesab edən M.Əhmədova qeyd edib ki, aliment bu fonddan ödənilməli, dövlət özü borclu ilə problemini həll etməlidir.

Bütün xəbərlər Facebook səhifəmizdə

Digər layihələrimiz


VTB