Saçlarda kəpək problemi və bunun təbii yollarla qarşısını almaq üsulları

Kəpək başın tüklü hissəsinin pilinqidir. Əsas yaranma səbəbi Malassezia Furfur adlanan göbələklərin həddindən artıq inkişafı nəticəsində baş dərisinin vəziyyətinin dəyişməsidir. Bu dəri problemi ilə həm qadınlar, həm də kişilər tez-tez rastlaşırlar. Buna görə də bir çox insan həkim müalicəsi ilə bərabər, ev şəraitində, yəni təbii yollarla bu problemdən xilas olmağın yollarını axtarır. Əslində hamımıza məlumdur ki, saçların müntəzəm yuyulması və daranması, daimi saç baxımı, uzun saçların tez-tez yığılmaması, stresin azaldılması, çox isti və ya çox soyuq su ilə yuyulmaması, tez-tez boyanmaması, bəzi kimyəvi saça qulluq vasitələrindən istifadənin azaldılması, günəş işığından məhrum buraxılmaması, B və Sink kimi vitaminlərin qəbulu, uyğun şampundan istifadə və bu kimi oxşar bir çox qaydalara əməl etmək saçlarda kəpəyin azalmasına kömək edir. SİA bu barədə xarici mətbuata istinad edir.

Ancaq bütün bunlarla yanaşı saçlardakı kəpəyi təbii yollarla aradan qaldırmağa kömək edən bir çox təbii üsullar da mövcuddur. Bunlardan ən çox tövsiyə edilənləri diqqətinizə çatdırırıq:

-Çay ağacı, kokos və zeytun yağı

Saçlardakı kəpək əleyhinə çay ağacı, kokos və zeytun yağları kimi təbii efir yağlarından istifadə edilə bilər.

-Aloe Vera

Aloe Vera kimi tanıdığımız əzvay bitkisi quru baş dərisini yumşaldır və kəpək problemini aradan qaldırır. Aloe ilə saçlar masaj edilir, bir neçə dəqiqə gözlədikdən sonra yuyulur. Bu prosesi kəpək problemi tamamilə yox olana qədər tətbiq etmək lazımdır. Bu prosesi tətbiq edərkən nəmləndirici xüsusiyyətə malik şampundan istifadə tövsiyə olunur.

-Kokos yağı

Bu yağ bakterisid xüsusiyyətinə görə dərinin nəmliyini artırmağa və kəpəyi azaltmağa kömək edir

-Çay ağacı efir yağı

Çay ağacı yağı kəpək əlamətlərini azalda bilən bakterisid və antiinflamatuar xüsusiyyətlərə malikdir. Bununla belə həssas dəridə qıcıqlanmaya səbəb ola bilər. Ona görə də tətbiq etməzdən əvvəl kokos yağı ilə qarışdırılmalıdır.

-Lavanda yağı

Lavanda yağı baş dərisini sıxlaşdıraraq onun daha hamar və sağlam olmasına kömək edir. Badam yağı kimi aromatrapiya yağları ilə qarışdırılaraq tətbiq edildikdə kəpək problemini aradan qaldırır.

-Zeytun yağı

Baş dərisi bir az zeytun yağı ilə ovuşdurulur və isti su ilə nəmləndirilmiş dəsmal ilə 40 dəqiqə bağlanır. Bu həftədə bir dəfə tətbiq edilir.

-Limon suyu

Limon suyu kəpəkli saçlardan xilas olmaq üçün təsirli vasitədir. Bu tətbiq saçın pH səviyyəsini tarazlaşdırır və baş dərisindəki göbələklərin inkişafının qarşısını alır. Bunun üçün saçlar limon şirəsi ilə masaj edilir, 20 dəqiqə gözlədikdən sonra yuyulur.

-Gicitkən otu

Gigcitkən otunu quru və ya təzə olaraq istifadə etmək olar. Bir çay qaşığı gicitkən otu 750 ml suda dörd dəqiqə qaynadılır. Süzüldükdən sonra əldə edilən su ilə saçlar isladılır. Yarım saat gözlədikdən sonra yuyulur və qurudulur. Bu üsulla həm kəpək problemi azalacaq, həm də saçlar parlaq olacaq.

-Probiotiklərin qəbulunu artırmaq

Probiotiklər immunitet sistemini gücləndirir və kəpəyin əmələ gəlməsini azaldır.

-Omeqa-3 qəbulunu artırmaq

Omeqa-3 yağ turşularının çatışmazlığı kəpəyə səbəb ola bilər. Qızılbalıq, alabalıq və skumbriya kimi yağlı balıqlar omeqa-3 yağ turşularının əla mənbəyidir. Bu məhsulların istifadəsini artırmaq kəpəyin azalmasına kömək edir.

-A vitamini baxımından zəngin qidaların qəbulu

Tərkibində A vitamini olan yerkökü, ərik, qaraciyər, cəfəri, kartof və balıq kimi qidaların qəbulu saçlarda kəpək problemini aradan qaldırır.

-Alma sirkəsi

Alma sirkəsi bakterisid xüsusiyyətə malik olduğu üçün kəpəyi azaldır. Bir xörək qaşığı alma sirkəsi bir stəkan su ilə qarışdırılır. Əldə edilən tərkiblə saçlar ovuşdurulur və 20 dəqiqə gözlədikdən sonra təmiz su ilə yuyulur.

Bütün xəbərlər Facebook səhifəmizdə

loading...