Yeni nəslin böyüdüyü dövr texnologiya əsridir

Təhsil Nazirliyi tərəfindən həyata keçirilən "Təhsildə inkişaf və innovasiyalar üzrə V qrant müsabiqəsi"nə "Ümumi təhsil müəssisələri" kateqoriyası üzrə 230, "Fərdi" kateqoriya üzrə 741 olmaqla, ümumilikdə 971 layihə təqdim edilib. Ekspert qrupunun qiymətləndirməsi əsasında "Ümumi təhsil müəssisələri" kateqoriyası üzrə 47, "Fərdi" kateqoriya üzrə 132 layihə olmaqla ümumilikdə ən yüksək bal toplayan 179 layihə qrant qazanıb.

Təhsildə inkişaf və innovasiyalar üzrə 5-ci qrant müsabiqəsinin fərdi kateqoriya üzrə qalib layihələrində biri də "Mənim animasiyam" dərnəyidir. Layihə rəhbəri Bakı şəhəri Nəsimi rayonu Yusif Mirzəyev adına 44 nömrəli tam orta məktəbin ibtidai sinif müəllimi Təranə Nuriyevadır. Layihə haqqında Təranə müəllimə bizimlə fikirlərini bölüşdü. Qeyd etdi ki, belə bir layihənin rəhbəri olmaq təbii ki, sevindirici bir haldır: "Əslində belə bir layihəni çoxdan idi ki, reallaşdırmağa çalışırdım. Təhsil Nazirliyi bunu reallaşdırmaqda mənə fürsət yaratdı. Təhsil Nazirliyinə xüsusi təşəkkürümü bildirirəm. Yeni nəslin böyüdüyü dövr texnologiya əsridir. Texnologiyasız özünü təsəvvür edə bilməyən bir nəsil ilə yaşayırıq. XXI əsrin tələbi olan "texnoloji əyləncələr" uşaqlarda diqqət yayınıqlığına, özünəqapanmağa, özgüvən əksikliyinə və yaradıcı təfəkkürün ləngiməsinə gətirib çıxarır. Lakin biz böyüklər nə etsək də uşaqlarımızı bu "texnoloji əyləncələrdən" təcrid edə bilmərik. Çünki dövr, zaman bunu bizdən tələb edir. Diqqət yayınıqlığı nəticəsində ibtidai sinif şagirdləri beyinlərində qurduqları fikirlərə fokuslanıb izah edə bilmirlər. Diqqət yayınıqlığı kreativ düşüncəni, analitik düşüncəni, göz və əlin bir-biri ilə koordinasiyasını ləngidir. Konsentrasiyanı gücləndirəcək ən yaxşı metod xırda detallarla işləməkdir. Çünki şagird bu zaman diqqətini cəmləməyə məcbur olur. Digər bir məsələ isə ibtidai sinif şagirdlərində özünəqapanıqlığın çox olmasıdır. Nəzərə alsaq ki, müasir dövr uşaqları ev şəraitində kompüterdə müxtəlif proqramlarla vaxt keçirirlər, bu qaçılmazdır. Nəticədə isə bu yaş qrupundakı uşaqlarda özgüvən əksikliyi yaranır. Araşdırmalara əsasən özgüvən əksikliyini 2 şəkildə aradan qaldırmaq olur. Bunlardan biri idman, digəri incəsənətlə məşğul olmaqdır".

Təranə Nuriyeva bildirdi ki, biz isə incəsənət və texnologiyanı birləşdirərək şagirdlərə "animasiya"nı təqdim edirik: "9-10 yaş qrupuna aid olan şagirdlər öz gördüklərini eləcə də görmək istədiklərini animasiya şəklində hazırlayırlar. Hazırladıqları məhsul onların yaratdığı orjinal məhsul olur. Nəticədə şagirdlərdə özgüvən problemi aradan qalxmış olur. Eyni zamanda şagirdlər animasiyanı yaradarkən kreativ şəkildə düşünməli olurlar. Bu da onlarda kreativ və analitik düşünməyə gətirib çıxarır. İkinci bir tərəfdən isə şagird öz düzəltdiyi animasiyanı ətrafdakı insanlara izah edərkən əlaqə, ünsiyyət qurmalı olur bu isə onun nitqini inkişaf elətdirir. Layihəmiz 15 sentyabrdan icra olunmağa başlamışdır. Oktyabr ayının ilk həftəsindən isə şagirdlər həftədə 1 dəfə 2 qrupa bölünərək dərslərə başlamışdır. Təlimçi proqramları mənimsətdikdən sonra isə dərnək üzvləri digər sinif yoldaşlarına da bu proqramları öyrədəcəklər. Beləcə həm məqsədimizə nail olacaq, həm də bir çox şagirdin öyrənməsinə vasitəçi olacağıq. Düşünürəm ki, bu layihə yeni nailiyyətlərə səbəb olacaq, yeni yanaşmalar ortaya çıxaracaqdır".

Nəzakət ƏLƏDDİNQIZI

Bütün xəbərlər Facebook səhifəmizdə