UNEC-də 34 ölkədən 354 əcnəbi tələbə təhsil alır

Azərbaycan Dövlət İqtisad Universitetində (UNEC) təhsil alan əcnəbi tələbələrlə görüş keçirilib. UNEC-dən SİA-ya bildirilib ki, Beynəlxalq Əməkdaşlıq Departamentinin təşkilatçılığı ilə keçirilən onlayn görüşdə tələbələrlə iş üzrə prorektor, dosent Səadət Qəndilova əcnəbi tələbələri universitetin ictimai-sosial həyatında fəal olmağa çağırıb. Prorektor onlara elmi tədqiqatların aparılması, müxtəlif layihələrin hazırlanması istiqamətində lazımi dəstəyin göstəriləcəyini bildirib.

Beynəlxalq Əməkdaşlıq Departamentinin direktoru Sənnur Əliyev əcnəbi tələbələrə miqrasiya sənədləşməsi və proseduraları ilə bağlı məlumat çatdıraraq, yarana biləcək problemlərin həlli istiqamətində onlara tövsiyələrini verib.

Görüşdə əcnəbi tələbələri maraqlandıran məsələlər müzakirə olunub, onların sualları cavablandırılıb.

UNEC-də Çin, Rusiya, Türkiyə, İran, Birləşmiş Ərəb Əmirlikləri, Küveyt, Əfqanıstan, Nepal, Maldiv, Mərakeşlə birlikdə 34 ölkədən 354 əcnəbi tələbə təhsil alır. Onların 302 nəfəri bakalavr, 45 nəfəri magistr, 7 nəfəri isə doktorant və dissertantdır. 2020/2021-ci tədris ilində isə UNEC-ə 100 nəfər əcnəbi tələbə qəbul olunub. Qəbul həm ənənəvi, həm də onlayn qaydada aparılıb.

Bütün xəbərlər Facebook səhifəmizdə

loading...