Elmlər doktorlarının 65 %-dən çoxu 61 yaşdan yuxarıdır

Statistik göstəricilərə görə, fəlsəfə doktoru proqramlarını bitirənlərin 13 faizi, elmlər doktoru proqramlarını bitirənlərin isə 11 faizi dissertasiyanı vaxtında müdafiə edə bilib. SİA-nın məlumatına görə, bunu təhsil naziri Mikayıl Cabbarov doktorantların və gənc tədqiqatçıların XXI respublika elmi konfransında çıxışı zamanı deyib.

Nazir qeyd edib ki, bu rəqəmlər narahatlıq doğurmaya bilməz: "Çünki bu, ali məktəblərin hazırlıq səviyyəsinin keyfiyyəti ilə bağlı məsələdir".

Nazir hesab edir ki, bu statistik göstəricilər gənclərin elmi fəaliyyətə aktiv cəlb olunması istiqamətində müvafiq addımların atılmasını zəruri edir: "Bu, qarşıda duran əsas vəzifələrdən biridir. Hesab edirik ki, ötən il qəbul edilən "Elm haqqında" qanun bu sahədə ciddi irəliləyişlərə nail olunmasına təkan verəcək. Bu qanun elm sahəsində müvafiq hüquqi baza yaratmaqla yanaşı, elmi fəaliyyətin stimullaşdırılması, elmi işçilərin sosial müdafiəsi, elmi vəzifələrə qəbul və digər məsələlərin həyata keçirilməsinə əsas yaradır. Qanunun verdiyi imkanlardan istifadə nəticəsində həm AMEA, həm də təhsil sahəsində gənclərin sayının əhəmiyyətli dərəcədə artırılması mümkün olacaq".

M.Cabbarov bildirib ki, hazırda Azərbaycanda fəlsəfə doktoru və elmlər doktoru proqramları üzrə ümumilikdə 2723 nəfər təhsil alır: "Fəlsəfə doktoru proqramı üzrə təhsil alanların 64 faizi, elmlər doktoru proqramları üzrə təhsil alanların 52 faizi ali məktəblərin payına düşür. Bu göstəriciləri yaş nisbəti üzrə müqayisə etdikdə görmək olur ki, elmlər doktoru proqramları üzrə təhsil alanların 34 faizini yaşı 40-dək olanlar təşkil edir. Əvvəlki dövrlərə nisbətən bu göstəricilər bir qədər artsa da, elmdə nəsillərin yenilənməsi daha sürətlə gedə bilər. Dövlət ali təhsil müəssisələrində yaşı 61-dən yüksək olan elmlər doktorlarının sayı 65 faizdən çoxdur. Biz bu faizin aşağı salınmasını yaşlı, savadlı insanlarımızın sayının azaldılması yolu ilə deyil, gənc tədqiqatçılar və alimlərin cəlb edilməsi yolu ilə etməliyik".

Müəllif: Nailə Məhərrəmova

Bütün xəbərlər Facebook səhifəmizdə

loading...