UNİSEF-in Azərbaycan nümayəndəliyinin təşkilatçılığı ilə keçirilən "Həyat üçün faydalı faktlar" toplusunun təqdimatı keçirilib. SİA-nın xəbərinə görə, tədbirdə çıxış edən Ümumdünya Səhiyyə Təşkilatının nümayəndəsi Sevil Əsədova maraqlı faktlar açıqlayıb. O bildirib ki, Azərbaycanda 3 milyon uşaqdan təxminən 10 faizi hələ də həll edilməmiş regional münaqişə üzündən torpaqlarından didərgin düşüb. S.Əsədovanın sözlərinə görə, qeyri-adekvat qidalanma vərdişləri üzündən reproduktiv yaşda olan hər 4 qadından 3-ü, eləcə də hər 5 uşaqdan 2-si anemiyadan əziyyət çəkir. Hər 4 uşaqdan 1-i qısaboyludur: "Hər 8 uşaqdan yalnız təxminən 1-i həyatının ilk 6 ayında müstəsna şəkildə ana südü ilə qidalanır. Bu isə qarşısının alınması mümkün olan uşaq xəstəliklərinin və problemlərinin yaranmasına səbəb olur".
ÜST-nın nümayəndəsi qeyd edib ki, Azərbaycanda hər iki saatdan bir 1 körpə dünyasını dəyişir. Bunun qorxulu statistika olduğunu deyən S.Əsədova vurğulayıb ki, lakin bunun qarşısını almaq mümkündür: "Bu isə yalnız həkimlərdən asılı deyil. Bütün əhalinin, valideynlərin bu bilgilərə yiyələnməsi vacibdir. Çox təəssüf ki, Azərbaycanda Azərbaycan dilində valideynlər üçün kitablar çox azdır".
Bütün xəbərlər Facebook səhifəmizdə
USD
EUR
GBP
RUB