Bu gün Bakı Dövlət Universitetində (BDU) ABŞ-ın Kaliforniya Texnologiya İnstitutunun kimya və fizika üzrə professoru, ABŞ prezidentinin məsləhətçisi, Nobel mükafatı laureatı Əhməd Həsən Zeveylinə universitetinin fəxri doktoru adı verilib. SİA-nın xəbərinə görə, BDU-da Zeveyline Fəxri doktorluq diplomunun təqdimetmə mərasimi keçirilib.
Tədbirdə çıxış edən BDU-nun rektoru Abel Məhərrəmov Ə.Zeveylinin həyat və yaradıcılığı haqqında ətraflı məlumat verib. Rektor Ə. Zeveyinin kimya və fizika sahəsində çoxşaxəli elmi fəaliyyətlə məşğul olduğunu, 1999-cu ildə kimyəvi reaksiyaların gözlə görülməsini təmin edən cihazı kəşf etdiyinə görə Nobel mükafatına layiq görüldüyünü diqqətə çatdırıb.A.Məhərrəmov qeyd edib ki, Zeveylin müsəlman dünyasında Nobel mükafatı almış iki şəxsdən biridir: "Əhməd Zeveylin dünyada elmin və demokratiyanın inkişafına verdiyi töhfələrinə, o cümlədən sülhməramlı fəaliyyətinə görə universitetin Elmi Şurasının 8 oktyabr 2001-ci il tarixli qərarı ilə BDU-nun fəxri doktoru adına layiq görülüb. Ümid edirəm ki, Zeveylin gələcəkdə mütəmadi olaraq BDU-nun tələbələri ilə görüşəcək, mühazirələr deyəcək".
Tədbirin davamında Ə.Zeveylinə fəxri doktor diplomu, xatirə hədiyyə təqdim olunub.
Ə. Zeveylin isə çıxışında BDU-nun fəxri doktoru olmasından məmnunluğunu dilə gətirib. O, daha sonra elm və təhsil, müsəlman ölkələrinin gələcəyi, demokratiya ilə bağlı fikirlərini bölüşüb, tələbələrin suallarını cavablandırıb.
Bütün xəbərlər Facebook səhifəmizdə
USD
EUR
GBP
RUB