Bu gün 2011-2012-ci dərs ilində Azərbaycanda orta məktəblərdə işləmək istəyən müəllimlər üçün növbəti imtahan keçrilir. Təhsil Nazirliyinin strateji təhlil, planlaşdırma və kadrların idarə olunması şöbəsinin müdiri Fərzəli Qədirovun SİA-ya verdiyi xəbərə görə, riyaziyyat müəllimləri bu gündən avqustun 24-dək imtahan verəcəklər. O bildirib ki, riyaziyyat müəllimi işləmək üçün 185 vakant yerə 1018 müəllim elektron ərizə verib. F.Qədirovun sözlərinə görə, 185 vakant yerin 26-si Bakı şəhərinin, 159-u isə respublikanın digər rayonların payına düşür: "Müəllimlərin işə qəbulu üçün imtahanlar tam olaraq avqustun 30-da başa çatacaq. "İmtahanlar haqqında məlumatlar elektron ərizə verən hər bir müəllimin şəxsi kabinetinə göndərilib. İmtahanda hər bir namizəd kompyuter qarşısında əyləşərək 1 saat ərzində ona verilən sualları cavablandıracaq. İmtahanda namizədə 35 sual təqdim ediləcək. İmtahan bitən kimi namizəd öz cavabını öyrənəcək. Namizədin topladığı bal kompyuterdə göstəriləcək".
Şöbə müdiri qeyd edib ki, avqustun 25-də informatika, avqustun 26-da coğrafiya, avqustun 29-da gənclərin çağırışaqədərki hazırlığı, əmək hazırlığı, musiqi və nəğmə, təsviri incəsənət, avqustun 30-da isə fiziki tərbiyə müəllimliyi ixtisasları üzrə imtahanlar keçiriləcək.
Qeyd edək ki, müəllimlərin işə qəbulu üzrə müsabiqədə iştirak etmək üçün 2177 vakant yerə 9342 nəfər ərizə təqdim edib. 2177 vakant yerin 374-ü Bakı, 1803-ü isə digər şəhər və rayonların payına düşür. Elektron ərizə verən 9342 müəllimin 1834-ü ibtidai sinif, 1389-u Azərbaycan dili və ədəbiyyat, 1018-i riyaziyyat, 440-ı informatika, 506-sı fizika, 338-i kimya, 436-sı biologiya, 761-i tarix, 408-i coğrafiya, 1610-u ingilis dili, 307-si fiziki tərbiyə, 68-i gənclərin çağırışaqədərki hazırlığı, 137-si əmək hazırlığı, 47-si musiqi və nəğmə, 43-ü təsviri incəsənət və rəsmxət ixtisasları üzrədir.
Bütün xəbərlər Facebook səhifəmizdə
USD
EUR
GBP
RUB