Bu gün Azərbaycan İlahiyyat İnstitutu (Aİİ) və Milli-Mənəvi Dəyərlərimizə Dəstək İctimai Birliyinin (MMDD) birgə təşkilatçılığı ilə “20 Yanvar” şəhidlərinin xatirəsinə həsr olunmuş “Tariximiz – milli dəyərimizdir” mövzusunda konfrans keçirilib. SİA-nın verdiyi məlumata görə, konfransda MMDD İctimai Birliyinin sədri, siyasi elmlər üzrə fəlsəfə doktoru Elvin Talışinski, Birliyin sədr müavinləri Qorxmaz Paşayev, Nərminə Quliyeva, "SƏS" Media Qrupunun rəhbəri Bəhruz Quliyev, Aİİ rəhbərliyi, İnstitutun müəllim və tələbə heyəti iştirak edib.
“20 Yanvar” şəhidlərinin əziz xatirəsi birdəqiqəlik ehtiram sükutu ilə anılıb. Aİİ rektoru mərasim iştirakçılarını salamlayaraq, ali tədris müəssisəsinin gənclərdə vətənpərvərlik ruhunun aşılanması istiqamətində müxtəlif tədbirlər həyata keçirdiyini diqqətə çatdırıb. İnstitut rəhbəri “20 Yanvar” hadisələrinin gənclərin milli ruhda tərbiyəsində və müstəqil dövlətçilik ənənələrinin inkişafındakı rolundan bəhs edib. Tariximizin öyrənilməsi, Azərbaycan həqiqətlərinin dünya ictimaiyyətinə çatdırılmasında gənclərin fəallığının daha da artırılması, onların müasir informasiya-kommunikasiya texnologiyalarından, sosial şəbəkələrdən səmərəli istifadəyə təşviq edilməsinin zəruriliyi qeyd olunub.
Azərbaycan İlahiyyat İnstitutunun rektoru Ceyhun Məmmədov bildirib ki, “20 Yanvar” hadisəsi xalqımızın tarixinə həkk olunmuş ən qanlı faciələrdəndir. Həmin müdhiş gecədə həlak olan Vətən oğulları Azərbaycan tarixinə parlaq səhifə yazmış, xalqın milli azadlığı, müstəqilliyi uğrunda canlarını fəda etmişlər.
MMDD İctimai Birliyinin sədri, siyasi elmlər üzrə fəlsəfə doktoru Elvin Talışinski çıxışında bildirib ki, “20 Yanvar” hadisəsinin tarixi əhəmiyyətlilik baxımından ictimaiyyətə çatdırılmasında, faciənin sosial və siyasi aspektinin mahiyyətinin gənclərə aşılanması istiqamətində dövlət qurumlarının, həmçinin vətəndaş cəmiyyətinin üzərinə məsuliyyətli vəzifə düşür.
Birliyin sədr müavini Qorxmaz Paşayev Mənəvi Dəyərlərimizə Dəstək İctimai Birliyinin hazırladığı “20 Yanvar” şəhidlərinin xatirəsinə həsr olunmuş “Tariximiz – milli dəyərimizdir” filminin lentə alınma məqsədindən, Nərminə Quliyeva isə filmdə iştirak edən gənclər və layihənin araya-ərsəyə gəlməsi haqqında məlumat veriblər.
"SƏS" Media Qrupunun rəhbəri Bəhruz Quliyev isə çıxışında 20 Yanvar faciəsinin canlı şahidi olmuş bir şəxs kimi, qanlı gecədə oğul və qızlarımızın ölümün gözünə dik baxaraq qəhrəmanlıq etdirdiklərini bildirib. Qeyd edib ki, 20 Yanvara matəm günü kimi deyil, qəhrəmanlıq tarixi kimi yanaşılmalıdır. “1990-cı ilin 19-dan 20-nə keçən gecə baş vermiş faciədə o zamanlar xalq hərəkatının önündə gedən adamların və sovet hakimiyyətinin başında dayananların günahının olması hər kəsə məlumdur. Amma bütün bunlara baxmayaraq, xalqımız öz müstəqillik mübarizəsini heç nəyə qurban vermədi. Həmin hadisənin səhərisi gün xalqımızın Ulu Öndəri Heydər Əliyev Moskvadakı Azərbaycan nümayəndəliyinə ailəsi ilə birlikdə gələrək, Bakıda baş vermiş qanlı olaya siyasi qiymət verilməsini və günahkarların cəzalandırılmasını tələb etdi”, deyən B.Quliyev bu gün şəhidlərimizin ruhuna ən böyük hörmət məhz müstəqil dövlətimizin yaşamasının və çiçəklənməsinin olduğunu bildirib.
Konfransda “20 Yanvar” şəhidlərinin xatirəsinə həsr edilmiş “Tariximiz – milli dəyərimizdir” filminin nümayişi keçirilib, tələbələr məruzə ilə çıxış ediblər.
Bütün xəbərlər Facebook səhifəmizdə
USD
EUR
GBP
RUB