Fevralın 24-də başlayan Rusiya-Ukrayna müharibəsi nəticəsində yaranan qlobal ərzaq böhranının həlli üçün Türkiyənin fəal diplomatiyası nəticəsində Birləşmiş Millətlər Təşkilatının (BMT) çətiri altında yol xəritəsi hazırlanıb.
SİA xəbər verir ki, diplomatik mənbələrdən əldə edilən məlumata görə, Türkiyə Ukraynadakı taxıl ehtiyatlarının təhlükəsiz şəkildə qlobal bazarlara çıxmasını təmin edəcək mexanizm qurmaq üçün bir müddətdir diplomatiya fəaliyyəti aparır.
Türkiyənin Rusiya, Ukrayna və BMT rəsmiləri ilə apardığı danışıqlar nəticəsində BMT çətiri altında “taxıl dəhlizi”nin fəaliyyət göstərməsi üçün yol xəritəsi hazırlanıb.
Bütün tərəflərin yol xəritəsinin detallarını müzakirə etmək üçün yaxın günlərdə İstanbulda görüşəcəyi gözlənilir.
Dördtərəfli görüşdə gəmilərin marşrutu, sığortası, təhlükəsizliyi, xüsusilə bölgədəki dəniz minalarının təmizlənməsi, komandanlıq mərkəzində olacaq zabitlər kimi məsələlər qiymətləndiriləcək.
Ukrayna və Rusiyanın müsbət yanaşdığı mexanizmlə Qara dənizdəki limanların ətrafında minalar təmizlənəcək, taxıl ehtiyatı təhlükəsiz şəkildə xarici bazarlara çıxacaq.
Türkiyənin Rusiya və Ukrayna arasında vasitəçiliyi ilə BMT-nin koordinasiyası ilə İstanbulda yaradılması planlaşdırılan mərkəz vasitəsilə Ukrayna və Rusiyadan 20 milyon ton taxılın dünya bazarlarına çıxarılması planlaşdırılır.
Qeyd edək ki, prezident Rəcəb Tayyib Ərdoğanın bu həftə Rusiya Prezidenti Vladimir Putin və Ukrayna Prezidenti Volodimir Zelenski ilə telefon danışıqlarının mühüm gündəm mövzularından biri də “taxıl dəhlizi” olub.
Prezident Ərdoğanla görüşündə Putin qeyd edib ki, ölkəsi Türkiyə ilə koordinasiyalı şəkildə maneəsiz yük daşımalarını, o cümlədən Ukrayna limanlarından taxıl daşınmasını asanlaşdırmağa hazırdır.
Prezident Ərdoğan Zelenski ilə görüşündə Ukrayna kənd təsərrüfatı məhsullarının dəniz yolu ilə ixracı üçün təhlükəsiz dəhliz yaradılması layihəsinə xüsusi önəm verdiyini bildirib.
Ərdoğan partiyalardan və BMT rəsmilərindən ibarət olacaq İdarəetmə Mərkəzində iştiraka və mərkəzin İstanbulda yerləşdirilməsinə prinsipial olaraq müsbət baxdıqlarını bildirib.
Diplomatik mənbələrə görə, Putin və Zelenski də “taxıl dəhlizi” üzrə əməkdaşlığa müsbət baxır.
Bütün xəbərlər Facebook səhifəmizdə
USD
EUR
GBP
RUB