Kuleba: "Türkiyə vasitəçilikdə ən uğurlu ölkə oldu"

Ukraynanın xarici işlər naziri Dmitro Kuleba Türkiyənin vasitəçilikdə ən uğurlu ölkə olduğunu bildirib.

Ukraynanın xarici işlər naziri Dmitro Kuleba Türkiyənin Ukrayna ilə Rusiya arasında vasitəçilik təklif edən ölkələrdən biri olduğunu ifadə edərək, “Türkiyə ən uğurlu ölkə oldu” deyib.

SİA-nın əldə etdiyi məlumata görə, Anadolu Agentliyi müxbirinin Türkiyənin Ukrayna ilə Rusiya arasında vasitəçilik prosesi ilə bağlı sualına Kuleba "Türkiyə müxtəlif səbəblərdən vasitəçilik təklif edən ölkələrdən biri idi. Türkiyə ən uğurlu oldu. Rusiya-Ukrayna müzakirə heyətlərinin İstanbuldakı görüşü də əsasən danışıqlar prosesinin ən yüksək nöqtəsidir” deyib.

İstanbuldakı görüşdən sonra danışıqlar prosesinin iflasa uğradığını qeyd edən Kuleba iki ölkə arasında danışıqları aparan işçi qrupunun sonuncu dəfə nə vaxt görüşdüyünü belə xatırlamadığını bildirib.

Rusiyanın davamlı olaraq “Ukraynanın diplomatiyaya ehtiyacı yoxdur, Ukrayna bizimlə danışmaq istəmir” kimi açıqlamalar verdiyini qeyd edən Kuleba “Ancaq bu, ört-basdır əməliyyatıdır” ifadəsini işlədib.

Kuleba Rusiya prezidenti Vladimir Putinin Ukraynanın Xerson və Zaporojye vilayətlərində yaşayanların Rusiya vətəndaşlığı qəbul etməsini asanlaşdıran qərarı imzalamasına da reaksiya göstərərək, "Əgər yaxşı niyyətli danışıqlar istəyirsənsə, belə şeylər etməzsən. Bu, bu qədər bəsitdir" deyib.

Kuleba alman jurnalistin sualına isə, müharibədə qalib gəlmək üçün ağır silahlara ehtiyaclarının olduğunu söyləyərək cavab verib.

Almaniyanın "Marde" və "Leopard" tipli tanklarının Ukraynaya tədarük oluna biləcəyi mesajını verən Kuleba "Təbii ki, arzumuz alman Leopard tanklarıdır" deyib. Kuleba belə bir ehtimalın hələlik uzaq olduğunu da vurğulayıb.

Kuleba qeyd edib ki, hər bir müharibə diplomatiya yolu ilə sona çatır, lakin Rusiya öz tankları, topları və təyyarələri ilə Ukraynaya hücumlarını davam etdirir.

Bütün xəbərlər Facebook səhifəmizdə