Səudiyyə Ərəbistanının başçılıq etdiyi koalisiya qüvvələri dünən Birləşmiş Ərəb Əmirliklərinin (BƏƏ) paytaxtı Əbu-Dabiyə edilən hücumlara cavab olaraq Sanaya hava hücumlarına başladığını açıqlayıb.
SİA-nın əldə etdiyi məlumata görə, Səudiyyə Ərəbistanının "SPA" xəbər agentliyi koalisiya qüvvələrinin bəyanatında "Paytaxt Sananın şimalında terrorçu liderləri hədəfə aldıq. Təhdidlərə cavab olaraq həyata keçirilən əməliyyatlar Sənanı vurmağa davam etməyi zəruri edir" deyilib.
Koalisiyanın digər bəyanatında təhdid qaynaqlarının zərərsizləşdirilməsi üçün hərtərəfli və çəkindirici əməliyyatın aparılacağı vurğulanıb.
Açıqlamada əməliyyatların təhdidlərə cavab olaraq və hərbi zərurət səbəbindən həyata keçirildiyi bildirilib:
“Səudiyyə Ərəbistanı və Birləşmiş Ərəb Əmirliklərində mülki şəxslərə qarşı düşmən hücumlarına görə məsuliyyət daşıyanlar cavab verəcək. Koalisiya hava qüvvələri Sana üzərində gecə-gündüz hava əməliyyatları aparır”.
Bəyanatda Sana əhalisi sağ qalmaq üçün Husi milislərinin olduğu icmalardan və hərbi düşərgələrdən uzaq durmağa çağırılıb.
Digər tərəfdən, Yəməndə İranın dəstəklədiyi husilər BƏƏ obyektlərini ballistik raketlər və pilotsuz uçuş aparatları (PUA) ilə hədəfə aldıqlarını açıqlayaraq hadisələrə görə məsuliyyəti öz üzərinə götürüblər.
Husilərin “El-Mesira” kanalında yayımlanan açıqlamada “Yəmən qasırğası” adlandırılan əməliyyatın “Səudiyyə Ərəbistanı, ABŞ və BƏƏ-nin hücumlarının artmasına cavab olaraq” həyata keçirildiyi bildirilib.
Açıqlamada Dubay və Əbu Dabi hava limanları, Əbu Dabinin Musaffah bölgəsindəki neft emalı zavodu, BƏƏ-yə aid bəzi mühüm və həssas obyekt və ərazilərin 5 ballistik qanadlı raket və çoxlu sayda PUA ilə hədəf alındığı qeyd olunub.
Husilərin gələcəkdə daha mühüm bölgə və obyektləri əhatə edəcək şəkildə hədəf ərazilərini genişləndirəcəklərinə diqqət çəkilən bəyanatda BƏƏ-dəki xarici şirkətlər, vətəndaşlar və sakinlər “vacib ərazilərdən və obyektlərdən uzaq durmağa” çağırılıb.
BƏƏ-nin paytaxtı Əbu-Dabinin Musaffah bölgəsinə pilotsuz təyyarənin hücumu nəticəsində 3 yanacaq tankerində partlayış baş verib, hücum nəticəsində 3 nəfər ölüb, 6 nəfər yaralanıb.
BƏƏ Xarici İşlər Nazirliyi hücumdan sonra verdiyi açıqlamada "Husi milislərinin BƏƏ ərazisini və mülki obyektləri hədəf alan hücumunu pisləyirik. Bu hücum cəzasız qalmayacaq. BƏƏ bu terror hücumlarına və gərginliyin artmasına cavab vermək hüququnu özündə saxlayır" ifadələrindən istifadə etmişdi.
Bütün xəbərlər Facebook səhifəmizdə
USD
EUR
GBP
RUB