Ukraynada baş vermiş təyyarə qəzası nəticəsində ölənlərin sayı artıb - YENİLƏNİB

Ukraynada baş vermiş təyyarə qəzası nəticəsində ölənlərin sayı artıb.

SİA "RİA Novosti"yə istinadən xəbər verir ki bu barədə Ukrayna Daxili İşlər Nazirliyinin son məlumatında qeyd olunub.

Məlumata görə, təyyarənin göyərtəsində 27 nəfər olub. İnsident nəticəsində onlardan 25 nəfəri dünyasını dəyişib.

Xarkov vilayəti yaxınlığında göyərtəsində kursantların olduğu hərbi təyyarənin qəzaya uğramasından sonra Baş Prokurorluq tərəfindən uçuş qaydalarının və ona hazırlığın pozulması ilə bağlı cinayət işi başladılıb.

***

Saat 23:25

Ukraynanın Xarkov vilayətində baş vermiş təyyarə qəzası nəticəsində ölənlərin sayı artıb.

SİA“RİA Novosti”yə istinadən xəbər verir ki, bu barədə Xarkov vilayətinin regional dövlət administrasiyasının rəhbəri Aleksey Kuçer bildirib.

Məlumata görə, insident nəticəsində 22 nəfər ölüb, iki nəfər sağ qalıb, daha 4 nəfərin taleyi məlum deyil.

“Hadisə yerindəyik. İlkin məlumatlara görə, təyyarənin göyərtəsində 28 nəfər olub, onların arasında 7 zabit, 21 kursant olub. Təəssüf ki, 22 nəfər ölüb, 2 nəfər sağ qalıb (1 nəfər ağır vəziyyətdədir), hazırda dörd nəfərin taleyi məlum deyil. Həyatları üçün dua edirik, təcili tibbi yardım göstəririk”, - deyə Kuçer özünün “Telegram” səhifəsində yazıb.

Bu rəqəmlər Ukraynanın Fövqəladə Vəziyyət üzrə Dövlət Xidməti tərəfindən də təsdiqlənib.

***

Saat 23:01

Ukraynanın Xarkov vilayətinin Çuquyev şəhəri yaxınlığında “An-26” tipli hərbi təyyarə qəzaya uğrayıb.

SİA “RİA Novosti”yə istinadən xəbər verir ki, bu barədə Ukraynanın Müdafiə Nazirliyindəki mənbə bildirib.

Məlumata görə, təyyarənin göyərtəsində kursantların olduğu bildirilir. Hadisə yerli vaxtla 20:45-də Çuquyev şəhəri yaxınlığında baş verib. Təyyarədə Xarkov Hava Qüvvələri Universitetinin kursantlarının təlim uçuşunun həyata keçirildiyi deyilir.

Aviaqəza nəticəsində ölənlərin və xəsarət alanların olduğu qeyd olunub. Məlumata görə, qəzaya uğrayan təyyarədə 23 nəfər – 5 ekipaj üzvü və 18 kursant olub. Ölkənin Daxili İşlər Nazirliyi insident nəticəsində 18 nəfərin öldüyünü, 2 nəfərinsə ağır yaralandığını təsdiqləyib.

Bütün xəbərlər Facebook səhifəmizdə