Rusiyanın hakim "Vahid Rusiya" ("Единая Россия") partiyasının Duma təmsilçiləri bəyan ediblər ki, Krımı Rusiyaya birləşdirmək üçünbir-iki həftə vaxt lazımdır. SİA-nın "Reuters" agentliyinə istinadən verdiyi xəbərə görə, bunu hakim partiyadan olan deputat Vyaçeslav Nikonov deyib: "Mənim fikrimcə, bu prosesi çox qısa müddətdə reallaşdırmaq olar, uzağı bir-iki həftəyə".
Rusiyalı deputat eyni zamanda bildirib ki, artıq Krım de-fakto "müstəqil dövlətdir" və onun ölkəsi Krımı Ukraynanın ərazisi kimi yox, məhz "müstəqil ölkə" qismində tanıya bilər.
"Kiyevin mərkəzi hökumətindən də bu barədə hər hansı razılığın alınmasına ehtiyac duyulmur"-deyə qeyd edən Nikonov bildirib ki, sözügedən proses tezliklə başa çatdırılacaq.
Onu da qeyd edək ki, məsələ ilə bağlı Rusiya Federasiyası Dövlət Dumasının vitse-spikeri Sergey Neverov da bununla bağlı fikirlərini bildirib. "Qnunvericiliyə aid olan bütün zəruri hallar referendumun nəticələrinə uyğunlaşdırılacaq"-deyə qeyd edən Neverov da bildirib ki, referendum Krımın gələcəyini təmin etmək üçün keçirildi.
Xatırladaq ki, hazırda rəsmi Kiyev və Moskva arasında kəskin siyasi qarşıdurma yaşanır və martın 16-da keçirilmiş referendum Avropa İttifaqı, ABŞ və digər aparıcı dövlətlər tərəfindən legitim olaraq tanınmır. Artıq Rusiyaya qarşı iqtisadi sanksiyaların da həyata keçiriləcəyi gözlənilir.
Qeyd edək ki, referendumun nəticələrinə görə, səsvermələrdə 1 milyon 524 min 563 nəfər (82,71%) iştirak edib. Rusiya mənbələri bildirirlər ki, onların 95%-i Krım yarımadasının Rusiyaya birləşdirilməsinə "hə" deyiblər.
Ukrayna hakimiyyəti isə referendum günü insanların zorla səsverməyə cəlb olunduqlarını müxtəlif faktlarla dünya ictimaiyyətinə təqdim edirlər.
Rövşən Nurəddinoğlu
Bütün xəbərlər Facebook səhifəmizdə
USD
EUR
GBP
RUB