1992-ci ildə BMT-nin Baş Assambleyası tərəfindən 17 oktyabr tarixi Yoxsulluğun Aradan Qaldırılması üzrə Beynəlxalq Gün kimi qəbul edilib. Hər il oktyabrın 17-də dünyanın müxtəlif yerlərində insanlar yoxsulluq, aclıq və zorakılıq qurbanlarına hörmət etmək, onlara dəstək vermək və yoxsulluğun insan hüquqlarının pozulması olduğunu xatırlatmaq üçün bir araya gəlirlər.
SİA yerli mənbələrə istinadən xəbər verir ki, 2024-cü ilin statistikasına əsasən, dünyada təxminən 700 milyon insan gündə 2,15 ABŞ dollarından az vəsaitlə yaşayır. Bu göstərici “ekstremal yoxsulluq” adlandırılır və qlobal səviyyədə ən ciddi sosial problemlərdən biri olaraq qalır. 2010-cu ildən 2019-cu ilə qədər dünyada ekstremal yoxsulluq içərisində yaşayan işçilərin payı 14,3%-dən 7,1%-ə düşüb. Bu, mühüm irəliləyiş olsa da, COVID-19 pandemiyası bu müsbət trendi dayandırıb və 2020-ci ildə yoxsulluq göstəriciləri 20 il ərzində ilk dəfə artıb.
BMT-nin proqnozlarına görə, 2030-cu ilə qədər ekstremal yoxsulluğun tamamilə aradan qaldırılması məqsədinə çatmaq mümkün olmayacaq. Bu tarixdə belə, 600 milyondan çox insanın hələ də ekstremal yoxsulluq şəraitində yaşayacağı gözlənilir.
2024-cü ildə ilk dəfə olaraq dünya əhalisinin 52,4%-i bir növ sosial müdafiə sistemi ilə əhatə olunub. Buna baxmayaraq, 3,8 milyard insan hələ də tamamilə sosial müdafiədən kənarda qalır və çoxları üçün bu müdafiə kifayət etmir.
BMT-nin 2030 Gündəliyi çərçivəsində müəyyənləşdirilmiş 17 Davamlı İnkişaf Məqsədi (DİM) içərisində birinci məqsəd yoxsulluğun bütün formalarının aradan qaldırılmasıdır.
BMT-nin Baş Assambleyası 2018–2027-ci illəri “Yoxsulluğun Aradan Qaldırılması üzrə BMT-nin Üçüncü Dekadası” elan edib. Məqsəd əvvəlki təşəbbüslərin nəticələrini qorumaq və Davamlı İnkişaf Məqsədləri çərçivəsində yoxsulluğa qarşı mübarizəni gücləndirməkdir.
Yoxsulluğun azaldılması istiqamətində son illərdə ciddi addımlar atılsa da, qlobal böhranlar, münaqişələr və qeyri-bərabərlik bu prosesi ləngidir. BMT və beynəlxalq ictimaiyyət üçün yoxsulluğun bütün formalarının kökündən ləğvi insanlıq qarşısında duran ən böyük çağırışlardan biri olaraq qalır.
Bütün xəbərlər Facebook səhifəmizdə
USD
EUR
GBP
RUB
