...Tacikistandan olan miqrant Rusiyadan deportasiya edilib, çünki Vnukovo hava limanının sərhədçiləri onun YouTube-a baxış tarixində tapıblar və rusofobiyanın təzahürü hesab ediblər. Miqrant izah etməyə çalışıb ki, bir il əvvəl işlənmiş smartfon alıb və onda belə bir şey olduğundan xəbəri olmayıb, amma yenə də, dəxli yoxdu, Rusiyadan qovulub.
...Son aylarda Rusiyaya daxil olmağa cəhd edən taciklər, çox vaxt heç bir izahat verilmədən kütləvi deportasiyalar və ölkəyə girişin rədd edilməsi barədə məlumat verməyə davam edirlər.
Bu yaxınlarda rus sərhədçilərinin Rusiyaya buraxmadığı şəxslərdən biri olan tacik, bir neçə il Rusiyada yaşayıb, işləsə də, yayda ayağını sındırıb və müalicə üçün evinə Tacikistana gedib.
Ayağı sağalandan sonra yenidən Moskvaya qayıdıb.
O deyir ki, miqrantların yoxlanılmasının gücləndirilməsi barədə eşitmişdi, lakin bütün sənədləri qaydasında olduğu üçün bunun ona təsir etməyəcəyinə əmin idi. Lakin Vnukovo hava limanına çatan kimi onu saxlayıblar.
...Pasport nəzarətində məndən niyə Rusiya vətəndaşlığını almadığımı soruşdular. Mənə dedilər ki, telefonumu ver, parolunu de. Aldılar, hər şeyi yoxlayırlar, YouTube-da hansı videolara baxdığımı axtarırlar və s.
Mərkəzi Asiya ölkələrindən olan digər həmsöhbətlər daha əvvəl Current Time-a bildiriblər ki, Rusiya sərhədçiləri miqrantların telefonlarında tapılan videolara xüsusi diqqət yetirirlər.
Deməli, telefon əvvəlcə sərhədçilər tərəfindən yoxlanılır. Sonra cihaz Federal Təhlükəsizlik Xidməti əməkdaşlarına göndərilir.
Qeyd edək ki, Moskvaya qayıdan həmən tacikin telefonundakı YouTube-da 90-cı illərdə Çeçenistandakı müharibənin görüntülərini tapdıqlarını bildiriblər. Buna görə də onunla artıq məxfi xidmətlər məşğul olur.
Onun sözlərinə görə, onlar taciklə çox kobud danışıb, rusları niyə sevmədiyini və niyə öldürmək istədiyini soruşublar. ...Mən bu kadrlara baxmışammı? Yox. Amma onlar mənə göstəriblər ki, mən onlara baxmışam. Axı mən bu telefonu bir il əvvəl almışam.
Qeyd etdiyimiz kimi, dəxli yoxdur, onu Rusiyadan deportasiya ediblər. Amma tacikistanlı hesab edir ki, bu, sadəcə, bəhanə idi: onun gözləri qarşısında sərhədçilər onlarla miqrantı Rusiyaya buraxmayıblar. Onun sözlərinə görə, bir qadın sadəcə pasportunda Türkiyədən möhür olduğuna görə deportasiya edilib. Digər 18 yaşlı oğlan isə telefonun düyməsi olduğu üçün sərhəddən geri qaytarılıb.
...Daha əvvəl Tacikistandan Moskvaya uçan başqa bir adam var idi. Sərhədçilər ona Özbəkistandan uçsa, içəri buraxacaqlarını deyiblər, o, belə edib, lakin sonra aldadıldığını anlayıb: nəticədə o, heç vaxt ölkəyə girməyib, 5 gün və 70 min rubl itirib.
...Əslində ruslar təkcə aldatmırlar, həm də başqa xalqların nümayəndələri ilə, bir növ məzələnirlər, halbuki...
Və yeri gəlmişkən, Tacikistanın əmək, miqrasiya və məşğulluq naziri Gülnora Xasanzodanın sözlərinə görə, bu ilin ilk altı ayında Rusiyadan 17 mindən çox Tacikistan vətəndaşı qovulub ki, bu da bütün ötən illə müqayisədə 6 min nəfər çoxdur. Departament rəhbəri deyir ki, indi bir çox Tacikistan vətəndaşları da işləmək üçün daha az səyahət edirlər: onlar Rusiyadan deportasiya olunmaq təhlükəsi ilə üzləşmək istəmirlər.
Əli Babayev
Bütün xəbərlər Facebook səhifəmizdə
USD
EUR
GBP
RUB