"HƏMAS"ın oktyabrın 7-də həyata keçirdiyi hücum və ondan sonra İsrailin Qəzzaya hücumları regional fəsadlar yaratdı. İsrail bu günədək Qəzzaya hücumları ilə minlərlə dinc sakini öldürüb. Qəzzaya qarşı başladılan quru əməliyyatı və bunun nəticəsində qəzzalıların Sinaya deportasiya edilməsi layihəsi İordaniya tərəfindən ikinci dəfə müharibə səbəbi kimi göstərildi. Quru əməliyyatının başlamasına baxmayaraq, İsrailin yaşayış məntəqələrində heç bir mənalı irəliləyiş əldə edə bilməməsi və daim mülki insanları hədəfə alması hətta Qərb dünyasının paytaxtlarında da kəskin etirazlara səbəb olur. Dünya ictimai rəyi getdikcə daha çox İsrail əleyhinə mövqe tutmağa məcbur edilir. Bundan əlavə, müharibənin Suriyada necə əks olunacağı maraq doğurur.
İsrail-"HƏMAS" müharibəsinin Suriya tərəfindəki ən böyük güc Hizbullah kimi görünə bilər. Lakin Həsən Nəsrullahın son açıqlamaları belə təəssürat yaratdı ki, Hizbullah aşağı səviyyəli gərginliyi davam etdirəcək və müharibəyə qarışmayacaq. İkinci güc kimi ABŞ və şiə milisləri arasında hərbi gərginlik təsiredici fakt kimi qəbul edilə bilər. İsrail Qəzzaya qarşı quru əməliyyatına başlasa da, görünən odur ki, İran Yəməndə husiləri cəlb etməklə müharibənin fəal cəbhəsi olmaqdan uzaq duracağını göstərib. Rahatlıqla demək olar ki, İraq və Suriyada ABŞ ilə hərbi gərginlik keçmişdə də göründüyü kimi hərbi itkilərlə nəticələnməkdən uzaqdır. Bütün bu məqamlardan çıxış edərək, İsrail-"HƏMAS" müharibəsinin Suriyaya təsirlərinin məhdud ola biləcəyini iddia etmək olar.
Əslində ABŞ-ın Aralıq dənizinin şərqində güclənməsi İrana qarşı çəkindirici element kimi qiymətləndirilməlidir. ABŞ rəsmilərinin də bu istiqamətdə açıqlamalar verməsi müharibənin Qəzzada başlaması və bitməsi siyasətini ortaya qoyur. İsrail də bu yanaşmanı mənimsəmiş kimi görünür. Bununla belə, İsrail Qəzzaya tam nəzarəti ələ keçirməyi hədəfləyən bir yanaşma tətbiq edərsə, təxminən 2,3 milyon qəzzalı Sinaya köç etmək məcburiyyətində qalacaq. İordaniya bu vəziyyəti müharibə səbəbi kimi ifadə edir. Eyni şəkildə Misirin də bu məsələni qırmızı xətt kimi xarakterizə etdiyi görülür. Əsl dalan və regional müharibə təhlükəsinin burada olduğunu iddia etmək mümkündür.
Sahədəki inkişaflara baxdığımızda İsrailin Qəzzada qeydə alınacaq irəliləyiş əldə edə bilmədiyi görünür. Hələ də yaşayış yerlərindən çox yollara və yaşayış olmayan ərazilərə nəzarəti ələ keçirməyə cəhd etdiyi, həm də şimal sektorunda sahilə də çataraq müəyyən mənada Qəzzanın şimalını mühasirəyə almağa çalışdıqlarını söyləmək olar. Lakin "HƏMAS"ın tunel şəbəkələrinə görə İsrailin bölgəni tamamilə mühasirəyə alması çox çətin görünür. Oktyabrın 7-dən İsrailin irəliləyiş sürətini nəzərə alsaq, müharibənin uzun müddət davam edə biləcəyi aydındır. İsrailin bütün Qəzzaya nəzarəti ələ keçirməkdə böyük çətinlik çəkəcəyini və beynəlxalq ictimaiyyətin təzyiqinin günbəgün artacağını proqnozlaşdırmaq olar.
Bütün xəbərlər Facebook səhifəmizdə
USD
EUR
GBP
RUB