Avropa İttifaqının (Aİ) Fələstinə yardımla bağlı ziddiyyətli açıqlamalar verməsi və yardımı dondurmaq qərarından imtina etməsindən sonra Avropa ölkələri də fərqli mövqe sərgiləyir.
SİA-nın əldə etdiyi məlumata görə, Almaniya hökuməti Fələstin ərazilərinə etdiyi inkişaf və infrastruktur yardımlarını nəzərdən keçirmək qərarına gəlib və ayrılan vəsaiti ödəməyi dayandırıb.
İnkişaf naziri Svenja Şulze "Biz bu çətin zamanda İsraillə tam həmrəyik. Fələstin ərazilərindəki insanlara verdiyimiz dəstəyin sülhə xidmət etməsi üçün hər zaman həssas olmuşuq. Bununla belə, İsrailə qarşı bu hücumlar dəhşətli dönüş nöqtəsidir. Ona görə də Fələstin əraziləri ilə bağlı bütün öhdəliyimiz nəzərdən keçirəcəyik" deyib.
Avstriyanın xarici işlər naziri Aleksandr Şallenberq ümumilikdə 19 milyon avroluq yardım layihələrini dayandırdıqlarını bildirib.
Fransa prezidenti Emmanuel Makron birbaşa Fələstin xalqının xeyrinə olan yardımların dayandırılmasının tərəfdarı olmadıqlarını bildirib.
Makron Almaniya kansleri Olaf Şolts ilə Almaniyanın Hamburq şəhərində təşkil edilən birgə mətbuat konfransında Avropa ölkələrinin Fələstin torpaqlarına etdiyi yardımların nəzərdən keçirilməsi ilə bağlı, "Biz Fələstin xalqına birbaşa fayda verən yardımın dayandırılmasının tərəfdarı deyilik. Bu yardımın "Həmas"ı maliyyələşdirə bilməməsi üçün öz prosedurlarımızı tətbiq etmişik" deyib.
Bu barədə Fransa Xarici İşlər Nazirliyinin bəyanatında isə deyilib:
“Biz Fələstin xalqına birbaşa fayda verən yardımın dayandırılmasının tərəfdarı deyilik”.
İspaniyada bəzi KİV-lər də hökumətin Aİ-nin yardımı dayandırmaq qərarı ilə razılaşmadığı barədə xəbərlər dərc edib.
Belçikanın inkişaf əməkdaşlıq naziri Karoline Gennez Fələstindəki vəziyyəti yaxından izlədiklərini, yardımları davam etdirməyi hədəflədiklərini və digər Aİ üzvləri ilə məsləhətləşərək mövqelərini müəyyən edəcəklərini bildirib.
Bildirilib ki, Aİ üzvü olmayan İngiltərə yardımı kəsmək niyyətində deyil.
İngiltərə mətbuatında yer alan xəbərlərə görə, hökumətdəki mənbə BMT vasitəsilə Fələstinə edilən milyonlarla dollarlıq xarici yardımın dayandırılması planının olmadığını bildirib.
İrlandiya Aİ Komissiyasının 691 milyon avrodan çox yardıma yenidən baxılması qərarını rədd edən ölkələr sırasında olub.
İrlandiya Xarici İşlər Nazirliyinin sözçüsü Aİ Komissiyasının qonşuluq və genişlənmədən məsul üzvü Oliver Varhelinin birtərəfli qərarının "hüquqi əsası olmadığını" bildirib və "yardımın dayandırılmasını dəstəkləmədiklərini" qeyd edib.
Qeyd edək ki, Aİ dünən "Həmas"ın İsrailə hücumundan sonra Fələstinə yardımla bağlı təəccüblü və ziddiyyətli açıqlamalar verib.
Bütün xəbərlər Facebook səhifəmizdə
USD
EUR
GBP
RUB