Britaniya parlamentinə təqdim edilməsi gözlənilən qanun layihəsi "Vaqner"in aktivlərinə həbs qoyulmasına da imkan verəcək. SİA xarici mətbuata istinadən xəbər verir ki, Britaniyanın daxili işlər naziri Suella Braverman "Vaqner"in qəddar və dağıdıcı olduğunu deyib: "“Vaqner" Putin Rusiyasının hərbi alətidir. Onun Afrika və Ukraynadakı fəaliyyəti qlobal təhlükəsizliyə təhdiddir”.
"Vaqner" Rusiyanın Ukraynaya təcavüzü ilə yanaşı, Suriya, Liviya və Mali kimi Afrika ölkələrində də mühüm rol oynayıb. "Vaqner" döyüşçülərinə qarşı qətl və işgəncə ittihamları irəli sürülüb.
ABŞ 2020-ci ildə "Vaqner"in Liviyanın paytaxtı Tripoli ətrafında minalar yerləşdirdiyini elan edib. İyul ayında Britaniya "Vaqner"in Mali və Mərkəzi Afrika Respublikasında işgəncələrə və edamlara görə məsuliyyət daşıdığını bəyan edib. Qrupun bu yay Rusiyaya qarşı uğursuz üsyanından sonra gələcəyi qeyri-müəyyən idi. Şirkətin təsisçisi Yevgeni Priqojin avqustun 23-də mindiyi təyyarə qəzaya uğrayan zaman şübhəli şəkildə ölüb. Qanun parlament tərəfindən qəbul edildikdən sonra şirkətə kömək edənlər 14 ilə qədər həbs oluna və ya 5000 funt sterlinqə qədər cərimələnə bilər. Hətta İngiltərədə ana müxalifət olan Leyboristlər Partiyası bir müddətdir ki, Vaqnerin terror təşkilatı elan edilməsini tələb edir. Dövlət Departamenti isə Vaqnerə qarşı müxtəlif sanksiyalar tətbiq edib və şirkət rəhbərlərinin aktivlərinin dondurulmasına qərar verib.
Bütün xəbərlər Facebook səhifəmizdə
USD
EUR
GBP
RUB