Ukrayna ölkənin cənubunu Krım yarımadası ilə birləşdirən körpüyə Britaniyanın uzaqmənzilli raketləri ilə hücum edib. SİA BBC-yə istinadən xəbər verir ki, bu barədə Rusiya rəsmiləri məlumat yayıb. Rusiya tərəfindən təyin edilmiş Xerson qubernatoru Vladimir Saldo bildirib ki, iki paralel Çonhar körpüsü hər ikisi zədələnib və heç kim xəsarət almayıb.
Onun sözlərinə görə, çox güman ki, Londonun “əmri” ilə Britaniyanın "Storm Shadow" raketləri hücumda istifadə olunub.
Körpü Krımdan cənubda cəbhə xəttinə gedən ən qısa yoldur. Bu körpü həm də Rusiya sərhədindən Ukraynanın cənubundan Krıma gedən sahil marşrutu üzərində yerləşən işğal altındakı Melitopol şəhəri ilə mühüm əlaqədir.
Vladimir Saldonun paylaşdığı şəkillərdən məlum olur ki, iki körpüdən birində boşluq var, lakin o, tezliklə təmir işlərinin aparılacağını və nəqliyyat vasitələrinin müvəqqəti olaraq alternativ marşrutla hərəkət edəcəyini bildirib.
Rusiya bu yoldan Krıma quru körpü kimi istifadə edir. Melitopolun isə Ukraynanın bu ayın əvvəlində əks-hücumunun hədəflərindən biri olduğu düşünülür.
Xatırladaq ki, Rusiya qüvvələri 2014-cü ildə Krım yarımadasını ələ keçirib, sonra isə ötən ilin fevralında Ukraynanın cənub sahil bölgəsini işğal edib.
Ötən ilin payızında isə Ukrayna Dnepr çayının şimalındakı Xerson bölgəsini geri alıb. Çaydakı Kaxovka bəndi bu ay Rusiyanın təxribat hücumu nəticəsində dağıdılıb və bu, Ukraynanın Dnepr üzərindəki hücumunu daha da çətinləşdirib. Ukraynanın əks-hücumu ləng irəliləyiş göstərib və indiyədək səkkiz kəndin geri alındığı iddia edilir.
Aysel Naibova
Bütün xəbərlər Facebook səhifəmizdə
USD
EUR
GBP
RUB