Kanadadakı meşə yanğınlarının tüstüsünün Norveçə də çatacağı gözlənilir. SİA-nın əldə etdiyi məlumata görə, Norveç səlahiyyətliləri qeyd edib ki, Kanadada günlərdir davam edən meşə yanğınları nəticəsində yaranan tüstünün ölkəyə təsir edəcəyini gözləyirlər.
Norveç İqlim və Ətraf Mühit Tədqiqat İnstitutunun (NILU) alimləri atmosferdə tüstünün dövranını proqnozlaşdırmaq üçün bir modeldən istifadə ediblər.
Alimlər tüstünün iyunun 1-dən etibarən Qrenlandiya və İslandiya üzərində hərəkət etdiyini və onun təsirlərinin Norveçin cənubunun havasında da müəyyən edildiyini bildiriblər.
NILU-nun baş elmi işçisi Nikolaos Evangeliou ölkədə duman və tüstü qoxusu ola biləcəyini, lakin onlar havadakı hissəciklərin sayının sağlamlığa zərər verəcək qədər çox olmayacağını bildirib.
ABŞ-ın şimal-şərq ştatları Kanadada baş verən meşə yanğınlarının tüstüsündən zərər çəkib.
Tüstü səbəbindən paytaxt Vaşinqtonda və onun ətrafında havanın keyfiyyət səviyyəsinə görə qırmızı xəbərdarlıq elan edilib.
Tüstü milyonlarla insana təsir edib, böyük hava limanlarında uçuşları dayandırıb və vətəndaşları yenidən maskalardan istifadə etməyə sövq edib.
Kanada ümummilli miqyasda 400-dən çox yanğınla mübarizə üçün beynəlxalq yardım istəyib.
Bütün xəbərlər Facebook səhifəmizdə
USD
EUR
GBP
RUB