İran və Taliban arasında qarşıdurma

İranla Taliban qüvvələri arasında sərhəddə baş verən qarşıdurma zamanı İranın 2 sərhəd keşikçisi və Taliban qüvvələrindən 1 nəfərin həyatını itirdiyi açıqlanıb.
İranın yarı rəsmi "Fars" xəbər agentliyinin bölgədəki mənbələrinə əsaslanaraq verdiyi xəbərə görə, İranın Sistan-Bəlucistan əyalətinin Hirmand rayonundakı Sasuli polis məntəqəsi yaxınlığında Taliban sərhəd qüvvələri ilə İran sərhəd keşikçiləri arasında qarşıdurma baş verib. .

İranın rəsmi agentliyi "İRNA"-nın məlumatına görə, Sərhəd Mühafizə Komandanlığından verilən açıqlamada, sərhəddə baş verən qarşıdurmalarda 2 İran əsgərinin şəhid olduğu, 2 əsgərin yaralandığı bildirilib. Toqquşmalarda Taliban qüvvələrinin də xeyli itki verdiyi bildirilib.

Açıqlamada Sasuli Polis Bölməsinin komandirinin ötən həftə Taliban tərəfindən öldürüldüyü, ətraflı məlumatın daha sonra açıqlanacağı bildirilib.

SİA-nın əldə etdiyi məlumata görə, Taliban İranı günahlandırıb.

Taliban müvəqqəti hökumətinin Müdafiə Nazirliyi İran əsgərlərinin Nimroz vilayətinin Kanq rayonunun sərhəd bölgəsində atəş açması nəticəsində iki tərəf arasında qarşıdurma yarandığını açıqlayıb.

Nazirlik "müharibə başlatmaq üçün bəhanə gətirmək və mənfi davranışda bulunmağın heç bir tərəfin marağında olmadığını" bildirərək, əlavə edib ki, Taliban administrasiyası hər hansı problemi həll etmək üçün dialoqu ən məqbul yol kimi görür.

Talibanın Daxili İşlər Nazirliyinin sözçüsü Əbdülnafi Tekur "tviter" hesabından etdiyi paylaşımda qarşıdurma nəticəsində hər iki tərəfdən bir nəfərin həyatını itirdiyini, çoxlu sayda yaralının olduğunu bildirib.

İran tərəfi isə Taliban atəşinə cavab verildiyini açıqlayıb.

İran Polis İdarəsinin baş komandanının müavini Kasım Rızayi Taliban qüvvələrinin mayın 27-də yerli vaxtla saat 10:00 radələrində sərhəddəki Sasuli Polis Bölməsinə ağır silahlardan atəş açmağa başladığını və İran sərhəd keşikçilərinin atəşə cavab verdiyini bildirib.

Rızayi sonradan bitən qarşıdurmaların bir neçə saat əvvəl başladığını və davam etdiyini vurğulayıb.

İran Polis Qüvvələrinin baş komandanı Əhməd Rza Radan da sərhəd keşikçilərinə “hər hansı sərhəd pozuntusu və təcavüzə” qətiyyətlə cavab verməyi tapşırıb.

Qeyd edək ki, son günlər Hilmənd çayında suyun paylaşılması ilə bağlı İran və Taliban arasında gərginlik yaşanır.