Çilinin mərkəzi və cənub bölgələrində tüğyan edən meşə yanğınlarında həyatını itirənlərin sayı 13 nəfərə çatıb.
SİA-nın əldə etdiyi məlumata görə, Fəlakətin Qarşısının Alınması və Müdaxilə Xidmətinin rəhbəri Mauricio Tapia deyib: "Təəssüflə bildirmək istəyirik ki, ümumilikdə 13 nəfər ölüb. Biobio bölgəsində 11 nəfər həyatını itirib. Helikopterin qəzaya uğraması nəticəsində isə boliviyalı pilot və çilili texniki işçi həlak olub''.
Çilinin kənd təsərrüfatı naziri Esteban Valenzuela verdiyi açıqlamada meşə yanğınlarına müdaxilə etmək üçün bölgəyə göndərilən yanğınsöndürmə helikopterinin qəzaya uğradığını bildirib.
La Araucania, Biobio və Nuble bölgələrində 50-dən çox meşə yanğınının davam etdiyi, indiyədək 45 min hektardan çox ərazinin yandığı qeyd edilib. Bölgədən minlərlə insanın təxliyə edildiyi, yüzdən çox evin isə tamamilə yandığı qeyd olunub.
Prezident Qabriel Boriçin təbii fəlakətin yaşandığı bölgəyə gedəcəyi bildirilib.
Boriç mərkəzi və cənub bölgələrində fövqəladə vəziyyətin elan edildiyini açıqlayıb.
Bütün xəbərlər Facebook səhifəmizdə
USD
EUR
GBP
RUB
