Respublikaçı Kevin Makkarti ABŞ Konqresində keçirilən səsvermənin dördüncü günündə 15-ci cəhddə Nümayəndələr Palatasının sədri seçilib.
Qeyd olunur ki, Kaliforniyadan olan 57 yaşlı deputat Respublikaçılar Partiyasının mühafizəkar qanadının nümayəndələrinə əhəmiyyətli güzəştlər etməli olub. Turların heç birində Makkarti tələb olunan 218 qanunverici səsi qazana bilmədi.
Son turda altı konqresmen namizədlərin heç birini dəstəkləmədi, bu isə Makkartiyə spiker vəzifəsinə seçilməyə imkan verdi, baxmayaraq ki, onun lehinə cəmi 216 qanunverici səs vermişdi.
Qeyd edək ki, son 100 il ərzində Nümayəndələr Palatasında spikerlər birinci turda səs çoxluğu ilə seçilirdi. Onu da qeyd edək ki, Konqres üzvləri spiker seçilməyənə qədər and içə bilməzlər.
Yeri gəlmikən, spiker ən mühüm səlahiyyətlərə malikdir: o, gündəliyi təsdiq edir, qanun layihələri və digər qanunvericilik təşəbbüslərini irəli sürür, palata adından Senat və Ağ Evin rəhbərliyi ilə danışıqlar aparır.
Xatırladaq ki, yanvarın 3-də yeni çağırışın qurultayı öz işinə başlayıb. 2022-ci ilin noyabrında keçirilən aralıq seçkilərindən sonra Respublikaçılar Nümayəndələr Palatasındakı 435 yerdən 222-ni alaraq nəzarəti ələ keçirdilər.
Makkarti Nensi Pelosini Demokratlar Partiyasının spikeri kimi əvəz etdi. O, 2007-ci il yanvarın 4-dən 2011-ci il yanvarın 3-dək və 2019-cu il yanvarın 3-dən 2023-cü il yanvarın 3-dək Palataya sədrlik edib.
Ağasəf Babayev
Bütün xəbərlər Facebook səhifəmizdə
USD
EUR
GBP
RUB