Qadın voleybolçulardan ibarət Azərbaycan millisinin üzvü Ayşən Abduləzimova Azərbaycan Voleybol Federasiyasının rəsmi "Facebook" səhifəsi vasitəsilə azarkeşlərin suallarını cavablandırıb. SİA voleybolçunun müsahibəsini nəzərinizə çatdırır:
- Ayşən neçə yaşında voleybolla məşğul olmağa başlayıb və voleybolu ona sevdirən nə olub?
- Voleybolla 8 yaşımdan məşğul olmağa başlamışam. Voleybolu mənə sevdirən elə voleybolun özü olub (gülür). Bu idman növünü həmişə sevirdim və şadam ki, bu yolu seçdim.
- Avropa klublarında görərik, İnşAllah.
- İnşAllah. Mən bu barədə hələ heç nə deyə bilmərəm. Daha doğrusu, bu haqda düşünmürəm. Çünki hazırda bütün fikirlərim milli komanda ilə bağlıdır.
- Ən sevimli azarkeşlərin?
- Sözsüz ki, valideynlərim.
- Ən sevdiyin oyunçu kimdir?
- Vaxtı ilə İtaliya millisinin şərəfini qorumuş Simona Gioli.
- Bir şəkili balası olan Ayşən sonuncu dəfə Şəkidə nə vaxt olub?
- Düzünü desəm, yadımda deyil. Amma Şəkini çox sevirəm. Bu sualdan sonra o yerlər üçün darıxdığımı anladım. Boş vaxtım olan kimi, oralara mütləq gedəcəm.
- Gələcəkdə məşqçi olmağı fikirləşirsiniz?
- Perspektivdə hər şey ola bilər. Amma bu sual məncə 3-4 ilə həll olunan və ya cavabı tapılan suallardan deyil. Mən hələ oynamaq istəyirəm, gələcəyi isə zaman göstərəcək.
- Karyeranızda ən çətin və ən yaddaqalan qarşılaşma hansıdır?
- 2014-cü ildə keçirilən dünya çempionatının ilk oyununu qeyd edərdim. Dünya reytinqinin üçüncüsü olan yaponlarla qarşılaşırdıq. O oyun yaddaşımdan silinməz. DÇ-də debüt oyunum idi. Yadımdadır ki, oyuna pis başladıq, amma toparlanıb tay-brekdə qələbə qazana bildik. Bu görüşü həm ən çətin, həm də ən yaddaqalan matçım kimi dəyərləndirərdim.
- Karyeranızı nə vaxt bitirəcəksiniz?
- Görsəm ki, voleybol artıq mənə həzz vermir, oyunun ləzzətini hiss edə bilmirəm və ya kiminsə yerini haqsız olaraq tuturam, karyeramı bitirəcəyəm. Ancaq ona qədər hələ var (gülür).
- 20 yaşdan voleybol oynamağa başlaya bilərəm?
- Həvəskar səviyyədə, əlbəttə ki.
Qeyd edək ki, ən maraqlı sualın müəllifi Ayşəndən xüsusi bir hədiyyə qazanıb.
Bütün xəbərlər Facebook səhifəmizdə
USD
EUR
GBP
RUB