Ölkə kubokunun yarımfinal mərhələsinin ilk oyununda "Qarabağ"ı qəbul edən və 0:2 hesabı ilə məğlub olan "Neftçi"nin müdafiəçisi Pavel Dreksa oyundan sonra jurnalistlərin suallarını cavablandırıb.
- Bizim üçün gözlənilməz oldu nəticə. Bəs sizin üçün necə, sürpriz olmadı?
- Oyunun bu cür nəticələnəcəyini biz də gözləmirdik. Meydana qələbə qazanmaq üçün çıxmışdıq. Qarşılaşma başa çatdıqdan sonra "Qarabağ"ın bizdən daha yaxşı oynadığını və buna görə qələbə qazandığını deyə bilərəm.
- Ruslan Abışovun yoxluğu məğlubiyyətdə rol oynadımı?
- Əlbəttə, Ruslanın yaxşı futbolçu olduğunu bilirik. Onun bu matçda bizə kömək etməyəcəyini də əvvəlcədən bilirdik. Bu 1-2 günün xəbəri deyil. Oyuna Ruslansız hazırlaşırdıq, oynamayacağını bilirdik. Onun əvəzinə meydana çıxan futbolçu da əlindən gələni etdi ki, yaxşı nəticə qazanaq.
- Qış fasiləsindən sonra "Qarabağ"la 1:1 hesablı heç-heçə etmişdiniz. Həmin oyunla bu matç arasında hansı fərqi qeyd edə bilərsiniz?
- "Qarabağ" bu gün daha yaxşı oynadı, nəinki qış fasiləsindən sonrakı matçda. Fərqlərdən biri də bu görüşün kubok çərçivəsində keçirilməsidi. Çempionat və kubok oyunlarında taktiki gedişlər fərqli olur. Əsas fərq isə oyunun nəticəsidi.
- Cavab oyununda revanş almaq, finala yüksəlmək mümkün olacaqmı?
- Əlbəttə, şansımız var. Hər şey mümkündür.
- Yəni 50-nin 50-yə?
- Belə deyil. Rəqib bizim meydanda qələbə qazanıb və üstünlük onların tərəfindədi.
- "Qarabağ"ın xidmətinizdə maraqlı olduğu deyilir. Bu nə dərəcədə həqiqətdi?
- Azərbaycan dilini bilmirəm və mətbuatınızı oxumuram. Ona görə nə yazıldığını bilmirəm. Bu xəbərə həqiqəti əks etdirmir, daha çox dedi-qodudu.
- Avropa Liqasına çıxmağınız üçün dördüncü pilləni tutmalısınız. "Zirə" ilə 4 xallıq fərqi aradan qaldırmaq mümkün olacaqmı?
- Şanslarımız həm çempionatda, həm də kubokda davam edir. Elə etməliyik ki, mövsümün sonunda Avropa Liqasına vəsiqə qazanaq. Bu, bizim arzumuzdu.
Bütün xəbərlər Facebook səhifəmizdə
USD
EUR
GBP
RUB