Azərbaycan Premyer Liqasının XVII turunun son oyununda "İnter"in qonağı olan "Neftçi" uzun fasilədən sonra qələbə sevinci yaşayıb. Oyundan sonra "ağ-qaralar"ın yarımmüdafiəçisi Namiq Ələsgərov apasport.az saytının da əməkdaşının suallarını cavablandırıb.
- Qələbə şərhinizi eşitmək istərdik...
- "İnter" çempionatımızın güclü komandalarından biridi. Buna görə də oyunun çətin keçəcəyini gözləyirdik. Meydanda gözlədiyimizlə qarşılaşdıq. Çətin olsa da, fasilədən sonra ilk qələbəmizi qazanmağa müvəffəq olduq. İndi bunun davamını gətirmək lazımdı.
- "Qarabağ" və "Qəbələ" ilə qalmaqallı oyunlardan sonra meydana çıxanda hansı hissləri keçirdiniz?
- "Qəbələ" ilə oyunda da heç-heçə oynamaq şansımız var idi, amma bəzi səbəblərdən bu istəyimiz alınmadı. Ona görə də keçən oyunlar haqda yox, gələcək matçlar barədə fikirləşmək lazımdı.
- Bu cür oyunla komandanızı hansı pillədə görürsünüz?
- İndi məqsədimiz xal ehtiyatımızı artırmaq və "dördlük"də yer almaqdı. Bunun üçün mübarizə aparacağıq.
- Əvvəlki 2 oyunda komandanız kobud hakim səhvlərindən vacib xallar itirdi. Bu dəfə necə, analoji vəziyyətlə üzləşəcəyinizdən ehtiyatlanırdınızmı?
- "Qarabağ" və "Qəbələ" ilə oyunlarda əleyhimizə hakim səhvləri oldu. Fikirləşdik ki, bu dəfə etməzlər. Etmədilər də. Normal idarəçilik oldu.
- Komandada özünüzü necə hiss edirsiniz?
- Təlim-məşq toplanışında iştirak etdim, yoxlama oyunlarında meydana çıxdım. Buna görə də uyğunlaşma baxımından problem yaşamadım. Artıq özümü komandanın bir parçası hesab edirəm.
- Yeni komandanızda qol hesabınızı açdınız. Bu qolun xüsusi yeri varmı?
- Sevindirici haldı. Amma vacib olan komandanın qələbəsidi.
- Ölkə kubokunun oyunlarında "Qarabağ"a qarşı oynamayacağınıza görə heyfslənmirsiniz?
- Çox heyfslənirəm. Komandama kömək etmək istəyirdim, amma...
- Bunu əvvəlcədən bilirdiniz?
- Xeyr, qış fasiləsindən sonra "Qarabağ"a qarşı keçirdiyimiz ilk oyundan əvvəl öyrəndim. Müqavilədə belə bir bənd yoxdu. Bu klub rəhbərləri arasında əldə edilmiş razılıqdı.
- Əvvəlcədən bilsəydiniz, etiraz edəcəkdiniz?
- Etiraz etməyə ehtiyac yoxdu. Rəhbərlik belə qərar veribsə, mən onu yerinə yetirməliyəm.
Bütün xəbərlər Facebook səhifəmizdə
USD
EUR
GBP
RUB