"Komandam rəqibdən üstün idi və oyun bunu sübut etdi. 90 dəqiqə üstünlük bizdə idi. Topa nəzarət etdik, qol şansları yaratdıq. Təəssüf ki, qol şanslarından kifayət qədər istifadə edə bilmədik. Diqqəti qarşıdakı çətin oyuna yönəltmək lazımdı". Apasport.az saytının məlumatına görə, bunu Azərbaycan yığmasının baş məşqçisi Robert Prosineçki dünən DÇ-2018-in seçmə mərhələsinin San-Marino ilə keçirilmiş oyundan (0:1) sonra təşkil olunmuş mətbuat konfransında deyib. Daha sonra baş məşqçi jurnalistlərin suallarını cavablandırıb.
- Xeyli sayda qol imkanı boşa verildi. Bunu necə izah edə bilərsiniz?
- Nəyə görə belə olduğunu deyə bilmərəm. Çətin vəziyyətdə Qurbanov qol vurdu, amma asan vəziyyətlərdən istifadə edə bilmədik. Bunun üzərində işləyəcəyik. Əsas odu ki, qələbə qazandıq və mərhələyə 3 xalla başladıq. Üstünlüyümüzü 90 dəqiqə sübut etdik. Növbəti oyun Norveçə qarşı olacaq.
- Böyük futbolçu olub, böyük klublarda çıxış etmisiniz. Nə vaxtsa Əfran İsmayılov kimi oynamısınız?
- Mən ondan yaxşı oynamışam. Ancaq deməzdim ki, zəif oynadı. Ruslan vurduğu qolun ötürməsini o verdi.
- Emin Mahmudovla Ramil Şeydayevin çıxışını necə dəyərləndirirsiniz?
- Eminlə bağlı danışmışam və bu səbəbdən bu gün ona daha çox şans verdim. Şeydayev də gəncdi. Hər ikisi az oynadı. Emin yaxşı top saxlayır və açılır. Ötürmələri də yaxşıdı. Ramil isə deyəsən, 4-5 dəqiqə oynadı. Amma razı qaldım.
- Qədim zamanlarda Pir adlı sərkərdə vardı. Həmin sərkərdə məğlubiyyətə bərabər qələbələr qazanırdı. Bu qələbәni "Pir qələbəsi" adlandırmaq olar?
- Bilirdim ki, bizi çətin oyun gözləyir. Rәqib zəif olsa da, azlıqda qalsalar da... Ancaq qələbə qazandıq. Lakin çox sevinmək lazım deyil. Rəqibi azlıqda qalmağa biz məcbur etdik.
- Milli komandanın qol imkanlarını boşa verməsi növbəti oyunlarda əleyhinizə işləyə bilər. Bu problemi aradan qaldırmaq üçün nə etmək fikrindəsiniz?
- Bütün oyunlar bizim xeyrimizə 1:0 bitsə, kifayətdi. Ancaq bu fikirlə razıyam. Hücumçu qol hissiyyatı ilə doğulmur. Belə olsa, hər kəs İbrahimoviç olardı. Məşqlərdə bunun üzərində işləyəcəyik. Hücumçu doğulanda isə uşaqlıqdan bu hissiyyat insanda olur. Bunun üzərində işləmək lazımdır.
- FİFA Dəniz Yılmazın Azərbaycan bayrağı altında oynamasına icazə verib. Bu haqda nə deyə bilərsiniz?
- Dəniz Yılmaz "Bursaspor"da çıxış edir, amma indi zədəlidi. O ümid edirdi ki, Türkiyə millisində çıxış edəcək, amma Fatih Terim onu çağırmadı. Sözsüz ki, bu cür futbolçunun bizim komandada çıxış etməsi sevindiricidi.
- Norveçlə qarşılaşmada qələbəyə söz verirsiniz?
- Sonuncu dəfə Norveçlə oyunda Azərbaycan ən yaxşı çıxışını nümayiş etdirdi. Üstəlik, bu oyun səfərdə olub. Növbəti ayda da rəqib eyni komandadı. Ancaq üzərimizdə işləyəcəyik və əlimizdən gələni edəcəyik ki, qələbə qazanaq.
Bütün xəbərlər Facebook səhifəmizdə
USD
EUR
GBP
RUB