\"Qarabağ\" niyə Qarabağda oynamır? (II hissə)

Yazımın ilk hissəsi Ağdamda \"Qarabağ\" futbol klubunun azarkeşləri arasında böyük maraqla qarşılanıb. Doğma komandalarının təəssübkeşi olan rayon sakinləri \"Qarabağ\"ın ev oyunlarını yenidən Quzanlı qəsəbə stadionunda görmək arzusundadırlar. Amma \"Qarabağ\" klubunun rəhbərliyi doğma stadionu olduğu halda, Bakıda 20 illiyə stadion icarəyə götürür. Əlbəttə, bu, ağdamlıları narahat etməyə bilməz.

Ağdam Rayon Gənclər və İdman İdarəsinin rəisi Elnur Əhmədov problemlə bağlı öz fikirlərini belə bildirib: \"Məqalə \"Qarabağ\" sevərlər tərəfindən böyük rəğbətlə qarşılanmışdır. İşğal altında olan Ağdamı layiqincə təmsil edən komandanın Quzanlı qəsəbə stadionunda ev oyunlarını keçirməsi yetişməkdə olan gənc nəslin futbola olan marağının artırılması ilə yanaşı, vətənpərvərlik hissinin aşılanmasına da müsbət təsir göstərir. Bu gün müvəqqəti olaraq rayon mərkəzini əvəz edən Quzanlı qəsəbəsində aparılan genişmiqyaslı abadlıq-quruculuq işləri, habelə rayon rəhbərliyinin bu sahəyə olan xüsusi diqqət və qayğısı imkan verir ki, komanda ev oyunlarını doğma azarkeşlərinin əhatəsində, Quzanlı qəsəbə stadionunda keçirsin\".

Qarabağ Qazilər Birliyi Ağdam rayon təşkilatının sədri Mahir Rzayev \"Qarabağ\"ın ev oyunlarını Ağdamda deyil, Bakıda oynamasının onlarda böyük təəssüf hissi yaratdığını qeyd etdib: \"İşğal olunmuş rayonu təmsil edən futbol klubunun iki il öncə Quzanlı qəsəbə stadionunda ev oyunlarını keçirməsi hər bir ağdamlı kimi, Qarabağ müharibəsi əlillərini və veteranlarını da çox böyük sevincə qərq etmişdi. Stadiona gedərək komandanın oyunlarını böyük həvəslə izləyir, bundan böyük zövq alırdıq. Bu gün isə çox üzgünük. Çünki klub rəhbərliyinin belə bir addım atması, ev oyunlarının paytaxtda keçirilməsi ağdamlıların sevincinə son qoyub. Cəbhə bölgəsində yaşayan hər bir ağdamlı arzulayır ki, sevimli komandaları \"Qarabağ\" yenidən ev oyunlarını Ağdamda, Quzanlı qəsəbə stadionunda keçirsin və qələbələri ilə onları şadlandırsın\".

AFFA-nın baş katibi Elxan Məmmədov da öz fikirlərini bildirib: \"AFFA \"Qarabağ\" komandasının ev oyunlarını Ağdam rayonunun Quzanlı qəsəbə stadionunda keçirilməsini dəstəkləməklə bunu regionda futbolun inkişafına, kütləviliyinin genişlənməsinə müsbət təsir göstərdiyi və yerli azarkeşlərin sevimli komandalarının ev oyunlarını canlı izləməyə imkanlar yarandığı üçün müsbət qarşılayır. Bununla yanaşı, onu da bildirmək istərdik ki, hər bir klub fəaliyyətində müstəqildir və çempionatda iştirakı üçün istənilən stadionla müqavilə bağlayıb onun xidmətindən istifadə edə bilər\".

Gənclər və idman nazirinin müavini İntiqam Babayev isə hesab edir ki, ölkə çempionatının Azərbaycan Premyer Liqa, birinci dəstə oyunlarının təşkili və keçirilməsi AFFA və Peşəkar Futbol Liqasının səlahiyyətində olduğundan, həmçinin təqvim oyunlarının hansı şəhərdə və stadionda keçirilməsini çempionatlarda iştirak edən klublar müəyyən etdiyindən problemə də məhz bu qurumlar aydınlıq gətirməlidir. Nazirlik rəsmisi onu da əlavə edib ki, məqaləyə münasibət bildirilməsi və araşdırılması üçün onlar tərəfindən AFFA-ya, Peşəkar Futbol Liqasına və \"Qarabağ\" futbol klubuna məktub göndərilib.

Komandanın sponsoru \"Azərsun\" Holdinqdən isə problemə münasibət natamam olub: \"Biz bu məsələ ilə bağlı heç bir fikir söyləyə bilmərik. Çünki kluba sponsorluq edirik, onların siyasəti isə bizləri maraqlandırmır. Klub hazırda Türkiyənin Antaliya şəhərində təlim-məşq toplanışındadır. Rəhbərlik gəlsin, sonra bu məsələ barəsində söhbət edərik\".

\"Qarabağ\" klubuna məsələ ilə bağlı məktub ünvanlasaq da, cavab gəlmədi. Bizə rəhbərliyin komanda ilə birlikdə Türkiyənin Antaliya şəhərində təlim-məşq toplanışında olduğunu bildirdilər.

\"Qarabağ\"ın azarkeş qruplaşması - \"İmarət\" fanklubunun üzvü Qabil Hüseynov bu problemin sırf psixoloji aspektlərinə də toxunur: \"Komandamızın Ağdamda oynaması qəlbi yaralı insanlara böyük bir təsəlli idi. Çünki ötən il \"Qarabağ\" orada qazandığı qələbələrlə hər kəsi sevindirmişdi. Lakin təəssüflər olsun ki, klub artıq Ağdama həsrətdir. Bunun da ən böyük səbəbkarı komanda rəhbərliyidir. Yorğunluğu bəhanə gətirərək orada oynamaq istəmədiklərini bildirmişlər. Ağdamda komanda 2 min azarkeş önündə oynayırdısa, Bakıdakı görüşlərdə bu say 40-50 nəfərdir. Bu da komandanın bu mövsüm qazandığı nəticələrə böyük təsir göstərmişdir. Hətta klubun baş məşqçisi Qurban Qurbanov da bildirmişdir ki, böyük azarkeş qarşısında oynayanda futbolçunun özünə inamı artır, daha yaxşı oyun sərgiləyir. Ümid edirik ki, \"Qarabağ\" bu il doğma yurduna, Ağdama qayıdaraq ev oyunlarını yenidən orada keçirəcək\".

Komandanın qələbələri ilə nəfəs alan yerli azarkeşlərin bu durumda olması görəsən klub rəhbərliyini heç narahat etmir? \"Qarabağ\"ın azarkeş qruplaşması \"İmarət\" fanklubu hər oyunda komandalarını sonadək dəstəkləyir, 12-ci oyunçu funksiyasını layiqincə yerinə yetirirdilər. Bununla bağlı şahidi olduğumuz hadisəni oxuculara danışmaq istərdim.

Klub rəhbərliyi, xüsusən də, sponsorlar təəssüf ki, Ağdamın \"Qarabağ\" klubunun azarkeşlərini nəzərə almır, eləcə də futbol klubunun şanlı tarixi keçmişinin üstündən çalın-çarpaz xətt çəkməyə çalışırlar. Azarkeşlərin qəlbinə dəymək, onları incitmək olmaz!Klubları ayaqda saxlayan, onları yaşadan məhz azarkeşlərdir, futbolu azarkeşlər üçün oynayırlar!

Qeyd edək ki, Gənclər və İdman Nazirliyinin və AFFA-nın cavabları qeyri-müəyyəndir. Futbol termini ilə desək, hərə topu bir-birinə ötürür! Bir tərəf deyir bu məsələyə baxmaq səlahiyyəti AFFA və Peşəkar Futbol Liqasınındır, digər tərəf isə bildirir ki, biz klubların işinə qarışa bilmərik!

Klubun Bakının Suraxanı rayonunda T.İsmayılov adına stadionu 20 illiyə, həm də çox baha qiymətə icarəyə götürdüyündən görəsən doğrudanmı bu təşkilatların xəbəri yoxdur? İnanılası deyil!

\"Azərsun\" Holdinqin cavabı isə olduqca qeyri-ciddidir: \"Klubun işinə qarışa bilmərik\". Çox maraqlıdır. Komandaya sponsorluq elə, sonra de ki, bu məsələ bizə aid deyil. Yaxşı bəs, Bakıdakı stadion kimin hesabına icarəyə götürülüb? Hələ ki, bu suala cavab verən yoxdur.

\"Qarabağ\"ın Ağdamda oynamağının ən önəmli amillərindən biri bura gələn klubların tərkibində çoxlu sayda legioner oyunçuların iştirak etməsi idi. Ən əsası isə o idi ki, onlar Qarabağ torpağını öz gözləri ilə görürdülər. \"Qarabağ\"da çıxış etmiş makedoniyalı oyunçu Artim Şakiri o yerləri görəndən sonra müsahibələrinin birində deyib: \"Mən indi başa düşdüm ki, Qarabağ Azərbaycan üçün nə deməkdir\". Hamı gördü ki, \"Qarabağ\" futbolçuları doğma Qarabağ torpağında necə həvəslə oynayırdılar. Bakıdan oyunlara baxmaq üçün jurnalistləri və azarkeşləri aparan avtobusların qarşısına yazılan \"Bu gün Quzanlıya, sabah Ağdama!\" şüarından tutmuş, azarkeşlərin \"qooollll\" sədalarına qədər hər bir amil təbliğat vasitəsi idi! Təəssüflər olsun ki, komanda rəhbərliyi \"Qarabağ\"ı Ağdamdan uzaq salmaqla, bunun üçün müxtəlif bəhanələr gətirməklə yerli izləyicini üzüb, futbolu Ağdamdan didərgin salıb!

Bu gün \"Qarabağ\"ın ölkə çempionatındakı vəziyyəti heç də ürəkaçan deyil! Artıq 17 ildir ağdamlı azarkeşlər bu sözü deyir: \"İnşallah, bu il doğma komandamız çempion olacaq!\". \"İmarət\"dən çıxandan sonra, komandanın çempionluq ruhu sanki "İmarət"də qalıb! Bütün komandalar Ağdamda "Qarabağ"la oynamağın sonunu yaxşı bilirdilər. Bu səbəbdən də \"Qarabağ\" orada oynayanda enerjilərini ikiqat sərf edirdilər, ikiqat əzmlə oyunlara çıxırdılar. Təəssüf ki, indi bu əzmi görmürük. Səbəb isə çox sadədir: çünki \"Qarabağ\" Ağdamda oynamır!