Beynəlxalq Avtomobil Federasiyasının (FİA) yarışlar üzrə direktoru və təhlükəsizlik məsələləri üzrə səlahiyyətli nümayəndəsi Çarli Vaytinq Bakıya səfər edərək, 17-19 iyun tarixlərində Azərbaycanın paytaxtında təşkil olunacaq 2016-cı il Formula 1 Avropa Qran Prisinin keçiriləcəyi Bakı Şəhər Halqasında hazırlıq işlərinin gedişatı ilə yaxından tanış olub. Bakı Şəhər Halqası Əməliyyat Şirkətindən SİA-ya verilən məlumata görə, Vaytinq və onun komandasının ötən ay keçirdiyi təftişdən cəmi bir neçə həftə sonra baş tutan sonuncu səfər zamanı trek və onun ətrafındakı yardımçı binaların Formula 1 Qran Pri yarışının keçirilməsinə hazırlıq səviyyəsi bir daha qiymətləndirildi. Aparılan hərtətəfli təftiş işlərindən sonra jurnalistlərin suallarını cavablandıran Vaytinq son işləri tamamlanmaqda olan şəhər trekindən böyük məmnunluğunu ifadə etdi: Sonuncu səfərimdən sonra həyata keçirilən hazırlıq işləri məni çox sevindirir. Trekdə yekunlaşmış işlərin həcminə baxdıqda, sözün yaxşı mənasında, təəccüblənirəm. Biz təxminən 4-5 saat vaxt sərf edərək, trekin hər bir qarışını yoxladıq. Ümumiyyətlə, trekdə bu günə qədər başa çatan işlərinkeyfiyyəti çox yüksəkdir və şəxsən öz adımdan qeyd etmək istərdim ki, bir həftədən sonra burada keçiriləcək tədbirdə iştirak etməyi həyəcanla gözləyirəm". Bakı Şəhər Halqası Əməliyyat Şirkəti (BŞH) 2016-cı il Formula 1 Avropa Qran Prisinin təşkili ilə bağlı lazımi hazırlıq tədbirlərinin böyük əksəriyyətini müvəffəqiyyətlə başa vurub və son tamamlama işlərini iyun 16-dan əvvəl başa çatdırmaq əzmindədir.
Hökumət Evinin qarşısındakı Paddokda yerləşən Pit binasının, o cümlədən, Beynəlxalq Avtomobil Federasiyası (FİA), Formula Bir Rəhbərliyi (FOM), Bakı Şəhər Halqası və tədbirin digər təşkilatçıları üçün nəzərdə tutulan inzibati binaların inşası artıq yekunlaşıb. Qeyd olunan binalarda texniki avadanlığın quraşdırılması işlərinin artıq son mərhələsi həyata keçirilir.
Bakı Şəhər Halqasının asfalt örtüyü artıq hazırdır. Belə ki, son asfalt örtüyünün çəkilməsi də yekunlaşıb. Trekin ətrafındakı təhlükəsizlik baryerlərinin quraşdırılmasıişlərinin 95%-i sona çatıb.
Şəhər sakinlərinin fasiləsiz hərəkətini təmin etmək üçün trekin bəzi yerlərində təhlükəsizlik baryerlərinin quraşdırılması qarşıdakı günlərdə həyata keçiriləcək. Eyni zamanda, 14-16 iyun tarixləri ərzində Bakı Şəhər Halqasının keçdiyi küçələr nəqliyyatın hərəkəti üçün tamamilə bağlanaraq son hazırlıq işləri, o cümlədən qalan təhlükəsiz baryerlərinin quraşdırılması, trekin yarış standartlarına müvafiq şəkildə boyanması və digər zəruri işlər həyata keçiriləcək.Bakı Şəhər Halqası ətrafında quraşdırılacaq bütün tribunaların tikintisinin bu həftə yekunlaşması nəzərdə tutulub. Bundan yanaşı, Formula 1 Şəhərciyinin yerləşəcəyi dənizkənarı bulvarda da hazırda tikinti-quraşdırma işləri sürətlə davam etdirilir.
Bakı Şəhər Halqasının üçölçülü görüntüsünü izləmək üçün bu keçidə daxil olun: https://www.youtube.com/watch?v=2WVGFfE-0fc
2016-cı il Formula 1 Avropa Qran Prisinə bilet satışı hələ də davam edir:
2016-cı il Formula 1 Avropa Qran Prisində iştirak etmək istəyən tamaşaçılar üçün bilet satışı və otellərin rezervasiyası BŞH-nın rəsmi saytında (www.bakucitycircuit.com) davam etdirilir. Biletləri, həmçinin, Gootickets.com, Grand Prix Tickets Worldwide (gpt-worldwide.com) və Formula1.comsaytlarından daəldəedəbilərsiniz.
2016-cı il Formula 1 Avropa Qran Prisinin biletlərini əldə etmək və Bakıya səfərinizi planlaşdırmaq üçün, bu linkə baş çəkməyinizi xahiş edirik: www.bakucitycircuit.com
Azərbaycanlı Gülhüseyn Abdullayev Bakı Şəhər Halqasında sınaq yürüşünə çıxan ilk pilot oldu
Keçirdiyi yarışlarda ümidverici nəticələr əldə edən azərbaycanlı Formula 3 pilotu və 2016-cı il Formula 1 Avropa Qran Prisinin rəsmi elçisi seçilmiş Gülhüseyn Abdullayev GP3 bolidində ən yeni şəhər treki olan Bakı Şəhər Halqasında dörd dövrə vuraraq bu trekdə sınaq yürüşünə çıxmış ilk pilot oldu.
19 yaşlı istedadlı pilot Bakı Şəhər Halqasında çoxsaylı azarkeş kütləsinin qarşısında ilk sınaq yürüşünü yekunlaşdırdıqdan sonra təəssüratlarını jurnalistlərlə bölüşdü:
"Bu halqanın çox qeyri-adi quruluşu var. Qoşa Qala qapaılarının qarşısından keçən 8-10-cu döngələr xüsusilə böyük maraq oyadır. Bu döngələrdə yarışmaq heç də asan olmayacaq. Əminəm ki, qarşıdakı yarışda biz nəfəskəsici anların şahidi olacağıq. Sınaq yürüşü zamanı trekdə digər nəqliyyat vasitələri olmadığı üçün bu,mənə çətinlik törətmədi, lakin yarışlar zamanı pilotlar əsl sınaqla üzləşəcəklər. Uşaq yaşlarımdan Azərbaycanda belə bir trekin olmasını və şəhər treki və yaxud daimi trekdə yarış avtomobili sürməyi arzulamışam. Bu gün mənim arzum həyata keçdi. Buna görə çox sevincliyəm".
Gülhüseyn Abdullayevin Bakı Şəhər Halqasında keçirdiyi sınaq yürüşünü bu keçiddən izləyə bilərsiniz: https://www.youtube.com/watch?v=EQgAET0KczI
Bütün xəbərlər Facebook səhifəmizdə
USD
EUR
GBP
RUB