Daniel Quiza “Fənərbaxça”dan getmək istəyir

11 Yanvar 2011 13:34 | 1 346

Türkiyənin "Fənərbaxça" klubunun ispaniyalı futbolçusu Daniel Quiza artıq bu komandada son günlərini sayır. Siasport.az saytı xəbər verir ki, 2008-ci ildə İspaniya yıgma komandasına futbol üzrə Avropa çempionluğunu yaşadan və ardından da İstanbul nəhənginə baş məşqçi gətirilən Luis Araqones, özü ilə bərabər Daniel Quizanı da "Fənərbaxça"ya gətirmişdi. L.Araqonesin uğursuz məşqçi fəaliyyətindən və istefaya göndərilməsindən sonra D.Quiza İstanbul klubunda qalsa da artıq bir neçə ildir ki heç bir uğur qazana bilmir. Neçə müddətdir ki, zədə üzündən klubuna yardım edə bilməyən və ondan gözlənilən futbolu meydanda sərgiləməkdə çətinlik çəkən ispaniyalının bir başqa kluba transferi gündəmdədir. Bir neçə ay əvvəl D.Quizanın xidmətində maraqlı olan İspaniyanın La Liqa klublarından olan "Malaqa" bu futbolçunu almaq üçün "sarı-Lacıvərdlilər"ə üz tutsa da, sonda "Fənərbaxça"nın bu futbolçunun transferi üçün yüksək rəqəmli qiymət qoyması hər şeyi alt-üst edib. Amma klub rəhbərliyi də artıq D.Quizanın "Fənər"də qalmasının heç bir əhəmiyyət daşımadığını anlayır. Futbolçunun özü isə dünən verdiyi açıqlamada İngiltərənin "Aston Villa" klubuna transfer olmaq istədiyini, bunun üçün "Fənərbaxça" prezidenti Əziz Yıldırımın icazə verməsinin gərək olduğunu dilə gətirib. Verilən məlumatda deyilir ki, əgər D.Quiza sağlamlıq testlərindən uğurla çıxarsa və maliyyə məsələsində ingilis və türk klubları razılığa gələrsə, bu transfer öz həllini tapacaq. Ehtimal olunur ki, İngilis klubu bir neçə gündən sonra konkret təkliflərlə "Fənərbaxça"nın qapısını döyəcək.

WhatsApp-da Səs Media Qrupu kanalını izləyin