Bütün dünya ölkələrində velosipeddən yalnız peşəkar idmançılar yox, adi vətəndaşlar da bir nəqliyyat vasitəsi kimi istifadə edirlər. İnsanlar işə, dərsə gedərkən və başqa məqsədlər üçün evdən çıxarkən də velosipedə üstünlük verirlər. Ölkəmizdə isə insanlar daha çox avtomobil sürür, hətta məhəllədə olan çörək dükanına belə avtomobillə getməyə üstünlük verirlər. Hər ikisi nəqliyyat vasitəsi olmasına baxmayaraq, onların istifadəsi insanların səhhətində, ekoloji təmizlikdə və maliyyə xərclərində tamamilə təzad təşkil edir. Belə ki, velosipeddən istifadə edərkən insanların səhhətində problemlər olmur, ekologiya zəhərli qazlarla çirklənmir və yanacaq üçün əlavə xərc tələb olunmur. Bəs ölkəmizdə insanlar gündəlik həyatlarında velosipedə niyə üstünlük vermirlər? Bu mövzuda Azərbaycan Bədən Tərbiyəsi və İdman Akademiyasının dosenti, Azərbaycan Velosiped İdmanı Federasiyasının Respublika dərəcəli hakimi, pedaqogika üzrə fəlsəfə doktoru, velosiped üzrə fəxri idman ustası Əli Xəlfəyevlə söhbət etdik.
O, öncə velosiped sürməyin insan orqanizmi üçün xeyrindən danışdı: "Velosiped sürən insanın bütün orqanizmi hərəkətdə olur. Bu zaman insanın əzələləri, sinir-sistemi, tənəffüs orqanı, qan-damar sisteminin fəaliyyəti yüksək olur. Bu da insan orqanizminin inkişafına səbəb olur. Velosipeddən 5 yaşdan 75 yaşa qədər hər kəs istifadə edə bilər. Məsələn, İsveçdə 5 yaşlı uşaqlar üçün velosiped yarışları keçirilir. Bu da insanların marağına səbəb olur. İki il bundan öncə, Dənizkənarı Bulvarda "7-77" yarışı keçirdik. O vaxt yarışa olduqca böyük maraq var idi".
Ə. Xəlfəyev ölkəmizdə insanların gündəlik həyatda velosipeddən az istifadə etməsinin səbəbləri barədə də danışdı. Dosent qeyd etdi ki, paytaxtda velosiped yollarının olmaması insanların gündəlik həyatda bu nəqliyyat vasitəsindən istifadəsinə mane olur: "ASAN xidmət işçiləri məndən velosipedlə işə gedib-gəlmələri ilə bağlı məsləhət aldılar. Ümumiyyətlə, rayonlarda bu iş daha real görünür, nəinki Bakıda. Çünki paytaxtda velosiped yolları, zolaqları yoxdur. Bakıda yaşayanlar üçün velosipeddən istifadə ancaq Velopark, Dənizkənarı Bulvar və Velotrekdə mümükündür. Ümumiyyətlə, Dənizkənarı Bulvarın ərazisi 25 kilometrə yaxındır. İnsanlar bir dəfə velosipedlə bu yolu qət etsələr, özləri üçün böyük iş görmüş olarlar. Ancaq təəssüf ki, Bakıda velosipedlə işə, dərsə getmək çox çətindir. Azərbaycanın bəzi rayon və şəhərlərində isə velosiped yollarının olması çox yaxşı haldır. Gəncə, Sumqayıt, Şəki, Qəbələni xüsusilə fərqləndirərdim.
Velosiped yollarının yaradılması üçün 2 dəfə konfrans keçirilib. Bu konfranslarda çıxış edib, öz konsepsiyamı irəli sürmüşəm. Bakının bəzi enli yollarında velosiped zolaqları çəkmək mümkündür".
O bildirdi ki, velosipedçilərin öz yollarının olmaması onların avtomobil yollarına çıxması ilə nəticələnir: "Bu da əlbətdə real təhlükədir. Çünki bu yol avtomobillər üçün olduğundan velosiped sürücülərinə qəzaları qaçılmaz edir. Məsələn, bu yaxınlarda Lənkəran rayonunda belə bir hadisə baş verib. Bakı şəhərində Yol Patrul Xidmətinin əməkdaşları avtomobil yolunda velosipedçi görərkən onları saxlayırlar. İstisna hallarda əgər velosipedçi öz məşqçisi ilə birlikdədirsə, onu avtomobil müşayiət edirsə buna icazə verilir. Düzdür, bunlar qəzaların qarşısını almaq üçün lazımdır. Ancaq velosiped yollarının olmaması Bakı şəhərində velosipedə olan marağa və inkişafa mane olur.
Hazırda istəyirik ki, baş məşqçi ilə birlikdə bu qadağanı tətbiq edən quruma gedib, onlardan bir mütəxssis istəyək ki, bizim velosipedçilərə seminar keçsinlər. Seminarı uğurla keçən şəxslərə vəsiqə versinlər ki, onlara şəhər daxilində velosiped sürmək imkanı verilsin".
Mütəxəssisin dediklərindən də aydın olur ki, ölkəmizdə insanların gündəlik həyatlarında velosipedə üstünlük verməməsinin səbəbi bu nəqliyyat vasitəsi üçün yolların olmamasıdır. Ümid edirik ki, yaxın vaxtlarda nəqliyyat axının sıx olan yerlərində velosiped sürücüləri üçün xüsusi zolaqlar salınacaq.
Elgün Vidadioğlu
Bütün xəbərlər Facebook səhifəmizdə
USD
EUR
GBP
RUB