Mərhum şahmatçımız Vüqar Həşimovun xatirəsinə həsr olunan "ShamkirChess 2015" turnirinin iştirakçısı Rauf Məmmədov yarışın rəsmi saytına müsahibə verib. SİA müsahibəni nəzərinizə çatdırır:
- "ShamkirChess 2015" turnirində 3 turdan sonra aktivinizdə 1,5 xal var. Son turda sabiq dünya çempionu Vladimir Kramniklə heç-heçə oynadınız. Bu partiya haqda nə düşünürsünüz?
- Aldığım vəziyyətdə çaşqınlıq yarandı. Öz oyunumdan razı qalmadım. Bəlkə də başqa gedişlər etməli idim. Ümumilikdə Vladimir Kramnik kimi şahmatçı ilə heç-heçə oynamaq pis nəticə deyil. Lakin oyunumdan narazı qaldım. Bəzi vəziyyətlərdə düzgün gedişi tapa bilmədim. 3 turdan sonra 1.5 xal normaldır.
- Kramniklə görüşdə əsas məqsəd heç-heçə oynamaq idi, yoxsa...
- Məşqçim Aleksandr Xalifmanla oyuna hazırlaşanda özüm üçün lazımi məsləhətləri aldım. Əsas normal mübarizə sərgiləmək və düzgün oynamaq idi. İkinci turda Aniş Giri ilə matçda çox yoruldum. 6 saata yaxın mübarizə mənə çox təsir etdi. Yorğunluq özünü göstərdi. Ona görə Kramniklə daha yaxşı oynamaq imkanım olmadı. İl yarım əvvəl Kramniklə daha yaxşı oynamışdım.
- Karyeranızda ilk dəfə belə güclü yarışda iştirak edirsiniz. Bəlkə ona görə çətinlik yaranır...
- Əlbəttə, Şəmkirdə ən güclü şahmatçılar mübarizə aparır. Mənim üçün çox güclü yarışdır. Fürsətdən istifadə edib məni dəvət etdikləri üçün təşkilatçılara təşəkkür edirəm. Azərbaycan çempionu kimi "ShamkirChess 2015" turnirinə dəvət aldım. Azərbaycan yığmasının heyətində güclü rəqiblərə qarşı çox oynamışam. Amma fərdi qaydada ilk mübarizəmdir. Belə turnirlərdə tez-tez iştirak etsəm. daha çox təcrübə toplayaram.
- "ShamkirChess 2015" turnirində növbəti rəqibiniz Uesli So olacaq. ABŞ təmsilçisi indi yarışın liderlərindən biridir...
- So yaxşı şahmatçıdır. Son dövrlər çox inamlı oynayır. Maykl Adamsa qalib gəlməklə heç də sürpriz etmədi. Çətin olsa belə, yaxşı oynamağa çalışacağam. Şəmkirdə asan mübarizə gözləmək olmaz. Hər tur mənim üçün çətindir. Bu sınaqdan çıxmağa qadir olduğumu göstərməliyəm.
- 10 şahmatçı arasında yekunda hansı pillədə qərarlaşmağı yaxşı nəticə hesab edəcəksiniz?
- Əsas odur ki, ilk onluqda olacağam (gülür). İstənilən oyunla ilk onluqda qərarlaşacağam. Çox istərdim bir qədər yaxşı nəticə göstərim. Çalışacağam qarşıdakı turlarda hamını qələbə ilə sevindirim. Sürpriz olsa belə, qələbəm olsun.
- Yarış ərəfəsində Maqnus Karlsenin turnirin əsas favoriti olduğunu söyləmisiniz. Bu fikirdə qalırsınız?
- Norveçli şahmatçı çox güclüdür. Karuananı qara fiqurlarla məğlub etdi. Əgər Karlsen yaxşı formadadırsa, onu dayandırmaq çox çətindir. Bəlkə də növbəti 30 il heç kim şahmat tacını ondan almağı bacarmadı. Maqnus sanki bir neçə il əvvəl "Barselona" kimidir. O vaxt kataloniyalılar məğlubedilməz idi. Onu ardıcıl dünya və Avropa çempionu olan İspaniya millisinə də oxşatmaq olar. Karlseni də məğlub etmək çətindir.
- Azərbaycan yığmasının digər üzvü Şəhriyar Məmmədyarovun çıxışı istədiyi kimi alınmır. Problemi nədə görürsünüz?
- Məmmədyarov bəzən turnirə yaxşı başlayır, sonda pis oynayır. Bəzən isə əksinə. 3 turdan sonra fikir bildirmək düzgün deyil. O, yalnız Karlsenə uduzub. Maqnusa çoxları uduzur. Bu normaldır. Məncə, Şəhriyar qarşıdakı turlarda daha yaxşı oynayacaq.
- "ShamkirChess 2015" turniri Vüqar Həşimovun xatirəsinə həsr olunub. Vüqarla bağlı hansı xatirəni bizimlə bölüşə bilərsiniz?
- Vüqar Həşimov güclü şahmatçı və yaxşı insan olub. Biz heç vaxt onu unutmuruq və unutmayacağıq. Əlbəttə yoxluğunu qəbul etmək çətindir. Təşkilatçılara təşəkkür edirəm ki, Vüqarın xatirəsinə belə yüksək səviyyəli yarış keçirirlər. Millidə olduğumuz zaman o, həmişə bizə kömək olub. Vüqar millinin uğurları üçün həmişə qələbə qazanmağa çalışıb. Onun yoxluğu bütün dünya şahmatı üçün böyük itkidir.
Bütün xəbərlər Facebook səhifəmizdə
USD
EUR
GBP
RUB