Hazırda Türkiyədə təlim-məşq toplanışı keçən Azərbaycan yığmasının və Almaniyanın "Ayntraxt" klubunun qapıçısı Emil Balayev jurnalistlərə müsahibə verib. SİA həmin müsahibəni təqdim edir:
- Hava şəraiti ilə əlaqədar olaraq, millinin düşərgəsinə gec qoşuldunuz. Bununla bağlı nə deyə bilərsiz?
- Düzdür, bir az yorğunluq var idi. Hava limanında demək olar ki, bir gün qaldım. Amma komandaya qoşulub, bir məşq keçəndən sonra yorğunluq keçdi. Təlim-məşq toplanışı yaxşı davam edir. Hər şey qaydasındadır. Hazırda toplanışda qapıçılardan Andrey Popoviçlə mən iştirak edirik. Kimin qapıda duracağına məşqçilər korpusu qərar verəcək.
- Robert Prosineçkinin ilk toplanışıdır. Xorvatiyalı baş məşqçi ilə bağlı da fikirlərini bilmək istərdik...
- Bildiyiniz kimi, Prosineçki yaxşı mütəxəssislərdən biri sayılır. Gördüyüm qədərilə komandada əhval-ruhiyyə də əladı. Prosineçki yaxşı məşqlər keçir. İnanıram ki, gələcəkdə onun rəhbərliyi altında uğur qazana biləcəyik.
- Alman dilini öyrənməyə başlamısızmı?
-Fevralın əvvəlindən alman dili dərsləri başlayıb. Sadəcə, hələ cəmi 1 dəfə dərsə getmişəm. Həftədə ya 1, ya da 2 dəfə dərslər olur. Deməzdim ki, alman dilini artıq bilirəm. İngilis dilini bildiyimdən, hələlik "Ayntraxt"da bu dildə ünsiyyət qururam. İnşAllah, alman dilini də öyrənəcəyəm.
-Almaniyadakı qapıçı məşqləri ilə millidəki məşqlər arasında nə kimi fərqlər var?
- Millidə də yaxşı məşqlər keçilir. Faiq Əzizov da güclü məşqçidir. Onun məşqləri alman məşqçilərin hazırlıq prosesindən böyük ölçüdə seçilmir. Millinin məşqləri də yüksək tempdə keçir.
- Millidə qapıçılar arasında böyük rəqabət var. "Ayntraxt"da oyun praktikasından əziyyət çəkməyiniz yığmadakı karyeranıza mənfi təsir edə bilərmi?
- Futbolçunun işi məşqdə özünü hərtərəfli göstərməkdir. Mən həm "Ayntraxt"da, həm də yığmada bunun üçün çalışıram. Son qərarı isə baş məşqçi verir. Əlimdən gələni edəcəyəm ki, hər iki komandada əsas qapıçı olum.
- Qapıçı üçün oyun praktikası böyük rol oynayır. Yəqin bununla razılaşarsız...
- Razıyam. Biz sadəcə olaraq, öz işimizi görməliyik. Nə bacarırıqsa, hamısını məşqlərdə göstərməliyik.
- Ehtimal varmı ki, "Ayntraxt"ın əsas qapıçısına çevriləsiniz?
- Orada şərait elədir ki, iki qapıçı ilə - Kevin Trapp və Feliks Vidvaldla rəqabət aparıram. Hər ikisinin 25 yaşı var. Vilvaldın yayda komandanı tərk edəcəyi gözlənilir. Trapp isə 2019-cu ilə qədər müqaviləsinin müddətini artırıb. Ola bilsin, komandada ikimiz qalaq. Mən də məşqlərimi edirəm. Çalışıb, əlimdən gələni edəcəyəm ki, əsas heyətə düşüm.
- "Ayntraxt"ın məşqçilər korpusunun sizə inamı varmı?
- Bəli, var. Mənə orada gənc oyunçu kimi böyük ümidlə baxırlar. 20 yaşım var. Məndən çox şey gözləyirlər, etimad göstərirlər. Mən də həmin etimadı doğrultmalıyam.
- Bu toplanış FİFA-nın "pəncərəsi"nə düşmədiyindən, legioner həyatı yaşayan digər futbolçular milliyə qoşulmadılar. Siz bu sarıdan klubunuzla problem yaşamadınız ki?
- Xeyr. Sadəcə belə şərt irəli sürdülər ki, əgər ikinci qapıçı zədələnsə, mən dərhal "Ayntraxt"ın düşərgəsinə qayıtmalı olacağam. Bu barədə AFFA-ya məlumat verdilər. Toplanış FİFA-nın "pəncərəsi"nə düşmədiyi üçün bu cür şərt irəli sürdülər.
Bütün xəbərlər Facebook səhifəmizdə
USD
EUR
GBP
RUB