"Azərbaycan Taekvondo Federasiyası (ATF) Bakı 2015 Avropa Oyunlarına hazırlığını uğurla davam etdirir". Bu sözləri SİA-ya açıqlamasında Azərbaycan Taekvondo Federasiyasının vitse-prezidenti Niyaməddin Paşayev deyib. O, yığma komandalarımızın Oyunlarda uğur qazanmaq üçün ciddi hazırlıq prosesi keçdiyini qeyd edib: "Həm oğlanlardan, həm də qızlardan ibarət yığmalarımız federasiyanın təlim-məşq bazasında hazırlıqlarını davam etdirirlər. Hər iki komanda baş məşqçilərin rəhbərliyi ilə gündə iki dəfə məşq edir. İdmançılara toplanış zamanı məskunlaşmaq üçün yer də ayrılıb.
Komandalarımızın hərəsinin xaricdə 2 həftəlik təlim-məşq toplanışları nəzərdə tutulub. Mart ayında qızlardan ibarət millimiz Koreyada, oğlanlardan ibarət yığmamız isə Asiya ölkələrindən birində hazırlıq keçəcəklər. Oğlanlardan ibarət yığmamızın təlim-məşq toplanışı keçəcəyi ölkənnin adı məlum deyil. Hazırda bununla bağlı danışıqlar aparılır. Orada yoldaşlıq görüşlərinin keçirilməsi də nəzərdə tutulub. Taekvondoçularımız bir neçə beynəlxalq turnirlərdə də güclərini sınayacaqlar. Birinci Avropa Oyunlarına 8 idmançı ilə qatılacağıq - 4 qız, 4 oğlan. Beynəlxalq turnirlərdən sonra Birinci Avropa Oyunlarında iştirak edəcək heyəti müəyyənləşdirəcəyik".
Federasiyanın vitse-prezidenti bildirib ki, ATF Bakı 2015 Avropa Oyunları Əməliyyat Komitəsi ilə yaxından əməkdaşlıq edir: "ATF-nin nümayəndəsi BAOƏK-də çalışır. O, taekvondo ilə bağlı bütün məsələlərdə Əməliyyat Komitəsinə yardımçı olur.
Federasiyamız BAOƏK ilə yaxından əməkdaşlıq edir. ATF-nin benəlxalq əlaqələr şöbəsi də işini peşəkarlıqla yerinə yetirir. Birinci Avropa Oyunları zamanı federasiyamız qonaqları qəbul edib, onlara lazımi informasiyaları verməyə, təqdimatlar etməyə hazırdır".
Bütün xəbərlər Facebook səhifəmizdə
USD
EUR
GBP
RUB